اسلام آباد: صدر مملکت آصف علی زرداری اور وزیر اعظم شہباز شریف سمیت مختلف سیاسی رہنماؤں نے ضلع کرم میں مسافر گاڑیوں پر فائرنگ کی شدید مذمت کردی۔

خیبرپختونخوا کے ضلع کرم میں پاراچنار سے پشاور جانے والی مسافر گاڑیوں پر مسلح افراد نے فائرنگ کردی جس کے نتیجے میں 15 افراد جاں بحق اور متعدد زخمی ہوگئے۔

پولیس ذرائع کے مطابق مسلح افراد نے اوچت کے مقام پر مسافر گاڑیوں پر حملہ کیا جب کہ جاں بحق ہونے والوں میں خواتین بھی شامل ہیں۔

پولیس ذرائع کا کہنا ہے کہ زخمی افراد کو طبی امداد کے لیے اسپتال منتقل کردیا ہے جب کہ سکیورٹی حکام نے علاقے کی ناکہ بندی کرکے ملزمان کی تلاش شروع کردی ہے۔

ضلع کرم میں مسافر گاڑیوں پر فائرنگ کے واقعے پر پاکستان کے مختلف سیاسی رہنماؤں اور حکومتی شخصیات نے گہرے دکھ اور افسوس کا اظہار کیا ہے۔

صدر مملکت آصف علی زرداری

صدر مملکت نے اس واقعے کی شدید مذمت کرتے ہوئے کہا کہ نہتے مسافروں پر حملہ ایک بزدلانہ اور انسانیت سوز عمل ہے جس کی کوئی معافی نہیں ہوسکتی۔

انہوں نے حملے میں قیمتی جانی نقصان پر لواحقین سے تعزیت کا اظہار کیا اور زخمیوں کو بروقت طبی امداد فراہم کرنے کی ضرورت پر زور دیا۔

صدر مملکت نے اس واقعے میں ملوث ذمہ داروں کے خلاف سخت کارروائی کی اہمیت پر بھی زور دیا۔ انہوں نے جاں بحق افراد کے لیے بلندی درجات اور متاثرہ خاندانوں کے لیے صبر جمیل کی دعا کی۔

وزیرِ اعظم محمد شہباز شریف

وزیرِ اعظم نے ضلع کرم میں خواتین اور بچوں سمیت معصوم شہریوں پر حملے کی شدید مذمت کرتے ہوئے حملے میں جاں بحق افراد کے لیے بلندی درجات اور اہلِ خانہ کے لیے صبر کی دعا کی۔

انہوں نے زخمی افراد کو بہترین طبی سہولت فراہم کرنے کی ہدایت بھی کی اور اس واقعے میں ملوث شرپسندوں کی نشاندہی ککے انہیں سخت سزا دینے کی ضرورت پر زور دیا۔

وزیرِ اعظم نے کہا کہ معصوم شہریوں پر حملہ ملک دشمن عناصر کی حیوانیت کا مظاہرہ ہے اور ان کی تمام مذموم کوششوں کو ناکام بنایا جائے گا۔

پی پی پی چیئرمین بلاول بھٹو زرداری

بلاول بھٹو نے بھی اس بزدلانہ حملے کی مذمت کی اور اسے معصوم شہریوں کو نشانہ بنانے والا انتہائی بربریت کا مظاہرہ قرار دیا۔

انہوں نے کہا کہ واقعے میں ملوث مجرموں کو قانون کی گرفت میں لایا جائے جب کہ انہوں نے اس حملے میں جاں بحق ہونے والے افراد کے خاندانوں سے دلی تعزیت اور یکجہتی کا اظہار کیا۔

وزیرِ اعلیٰ سندھ سید مراد علی شاہ

وزیرِ اعلیٰ سندھ نے بھی اس وحشیانہ حملے پر افسوس کا اظہار کرتے ہوئے کہا کہ اس طرح کے قاتلانہ اور گھناؤنے جرائم کی پوری قوم مذمت کرتی ہے۔

انہوں نے اس حملے کو ایک وحشیانہ عمل قرار دیا اور کہا کہ ان ناسور عناصر کا جلد خاتمہ ضروری ہے۔ وزیرِ اعلیٰ سندھ نے زخمیوں کی جلد صحتیابی کی دعا کی اور سوگواران سے دلی ہمدردی کا اظہار کیا۔