وزیر اعلیٰ بلوچستان میر سرفراز بگٹی نے کہا ہے کہ دہشت گردی کو جڑ سے اکھاڑ پھینکنے کے لئے پرعزم ہیں۔

وزیر اعلیٰ سرفراز بگٹی سے پیپلز لائرز فورم کے عہدیداران و اراکین کی ملاقات ہوئی جس میں صوبے کی مجموعی سیاسی و سماجی صورتحال پر تبادلہ خیال کیا گیا۔

ملاقات میں ریلوے اسٹیشن بم دھماکے کے شہداء کے لئے دعا مغفرت کی اور  صدر مملکت آصف علی زرداری کی صحت یابی کیلئے بھی دعا کی۔

اس موقع پر وزیر اعلیٰ سرفراز بگٹی نے پیپلز لائرز فورم کے عہدیداران و اراکین سے بات چیت کرتے ہوئے پیپلز لائرز فورم کی فعالیت اتحاد و اتفاق کے لئے خصوصی کمیٹی قائم کردی۔

انکا کہنا تھا کہ دہشت گردی سے نمٹنے کیلئے وکلاء سمیت تمام طبقات کو اپنا کردار ادا کرنا ہے، دہشت گردی کے خلاف جنگ صرف فوج یا سیکیورٹی فورسز کی نہیں، ہر فرد کی جنگ ہے۔

سرفراز بگٹی نے کہا کہ آئندہ کی نسلوں کے محفوظ مستقبل کے لئے دہشت گردی کا خاتمہ ضروری ہے، دہشت گردی کو جڑ سے اکھاڑ پھینکنے کے لئے پرعزم ہیں۔

انہوں نے مزید کہا کہ بلوچستان میں گڈ گورننس کے قیام کے لئے کوشاں ہیں، عوام کو درپیش مسائل کے حل کیلئے وکلاء متحرک کردار ادا کریں، صوبے کے دور دراز علاقوں میں وکلاء عوام کی رہنمائی و معاونت کریں، آئینی بینچز کی تشکیل پاکستان پیپلزپارٹی اور اتحادی جماعتوں کا تاریخی اقدام ہے۔

ملاقات میں صوبائی وزراء میر صادق عمرانی،  بخت محمد کاکڑ، حاجی علی مدد جتک ارو پارٹی رہنماء سید اقبال شاہ بھی موجود تھے۔