تحریک انصاف کے امریکی حمایتیوں کا ایک اور یو ٹرن سامنے آگیا ہے جس میں “امریکی مداخلت نامنظور” سے “امریکی عدم مداخلت نا منظور” کا دلچسپ سفر ہوگیا ہے۔

تحریک انصاف کے چند حمایتیوں نے قومی مفاد میں کام کرنے کی بجائے سیاسی مفاد کو ایک مرتبہ پھر فوقیت دے دی، 46 ممبران کانگریس سے صدر بائیڈن کو ایک اور خط لکھوا دیا ہے۔

تحریک انصاف کے چند امریکی حمایتی اتنے با اَثر ہیں یا کہانی کچھ اور ہے؟، تحریک انصاف کے اصل حمایتی کون؟ خط در خط در خط نے سوالوں کے انبار لگا دیے ہیں۔

خط میں نا کشمیر کا ذکر نا پاکستان کے خلاف ہونے والی دہشت گردی کا بلکہ خط میں پاکستان کی معاشی مدد کی بھی کوئی درخواست نہیں، اَثرو رسوخ کا استعمال صرف تحریک انصاف کے حق میں کیوں ہورہا ہے؟۔

اگر بات انسانی حقوق کی خلاف ورزیوں کی ہے تو ایسا کوئی خط کبھی کشمیریوں کے خلاف ہونے والے مظالم پر کیوں نا لکھوایا جا سکا؟، خط میں پاکستان پر بے جا الزامات کا ذکر ہے جب کہ الیکشن میں دھاندلی کی طوطا کہانی اور بنا ثبوت متفرق الزامات لگائے گئے ہیں۔

صدر بائیڈن کو لکھے گئے خط میں پاکستان کے اندرونی معاملات میں مداخلت کی باضابطہ درخواست کر کے تحریک انصاف نے اپنے ہی بیانیے کو زمین بوس کردیا ہے۔

غلامی نا منظور کا علم بلند کرنے والوں نے آزادی نامنظور کا نعرہ لگا دیا ہے جب کہ خط میں اسلام آباد میں موجود امریکی سفیر اور امریکی سفارت خانے پر بھی بے جا تنقید کی گئی ہے۔

امریکی سفارت خانہ کا رویہ بدلنے کی آرزو بھی خط میں موجود ہے جب کہ صدر بائیڈن کو خط میں لکھا گیا ہے کہ امریکی سفارت خانے کی کوئی بھی تگ و دو ہمارے علم میں نہیں۔

یاد رہے کہ تحریک انصاف اور عمران خان نے امریکی سفارت خانے کی سرگرمیوں کے خلاف انتہائی سخت بیانیہ بنایا تھا۔