پشاور: رہنما پی ٹی آئی شیخ وقاص اکرم کا کہنا ہے کہ آنے والے دن اس ملک اورعوام کے لئے اہم ہیں۔

رہنما پی ٹی آئی شیخ وقاص اکرم نے کہا 24 نومبر انتہائی اہم دن ہے، 29نومبر کو 9 مئی کے کیسز کی سماعت ہے جب کہ آج جو توشہ خانہ کیس کا فیصلہ ہوا یہی امید تھی۔

شیخ وقاص اکرم نے کہا کہ امید ہے 29 نومبر کو بھی شواہد کو سامنے رکھتے ہوئے فیصلہ ہوگا، بانی پی ٹی آئی کے خلاف سب کیسز جھوٹے ہیں۔

رہنما پی ٹی آئی نے دعویٰ کیا کہ کہیں بھی شواہد موجود نہیں، سب جعلی کیسز ہیں، جب ایسے فیصلے آتے ہیں تو عدالتوں کو مشکلات کا سامنا کرنا پڑتا ہے۔

شیخ وقاص نے مزید کہا کہ ہماری پارٹی سیاسی جدوجہد پر یقین رکھتی ہے، اپنے اہداف کو پورا کریں گے جب کہ اس مارچ میں پارٹی کے علاوہ بھی لوگ شامل ہوں گے۔