وزیراعلیٰ سندھ سید مراد علی شاہ نے کہا ہے کہ گلگت بلتستان کے بچوں کی سندھ کی یونیورسٹیز میں سیٹیں بڑھانے کا جائزہ لیں گے۔

وزیراعلیٰ سندھ سید مراد علی شاہ سے وزیراعلیٰ گلگت بلتستان گلبہار خان کی ملاقات ہوئی۔

ملاقات میں گلگت بلتستان کے وزیر برائے ایکسائیز حاجی رحمت خلیق اور وزیراعلیٰ گلگت بلتستان کے اسپیشل اسسٹنٹ حسین شاہ بھی شریک تھے۔

وزیراعلیٰ گلگت بلتستان گلبہار خان نے کہا کہ سندھ کے میڈیکل اور انجنیئرنگ کالیجز میں گلگت بلتستان کے بچوں کی سیٹیں بڑھائی جائیں، کراچی میں گلگت بلتستان کے دس ہزار بچے زیرِ تعلیم ہیں۔

سید مراد علی شاہ کا کہنا تھا کہ گلگت بلتستان کے بچوں کی سندھ کی یونیورسٹیز میں سیٹیں بڑھانے کا جائزہ لیں گے۔

وزیراعلیٰ گلگت بلتستان نے وزیراعلیٰ سندھ سے درخواست کی کہ گلگت بلتستان کے بچوں کے لیے ہاسٹل بنا کر دیں۔

سید مراد علی شاہ نے کہا کہ پیپلز پارٹی حکومت اراضی کا بندوبست کر کے ہاسٹل قائم کرے گی، چیئرمین بلاول بھٹو نے مجھے گلگت بلتستان میں این آئی سی وی ڈی قائم کرنے کی ہدایت دی ہے۔

ان کا کہنا تھا کہ میں جلد گلگت بلتستان کا دورہ کروں گا اور جو سہولیات سندھ حکومت فراہم کرے گی ان کا اعلان کروں گا۔

گلبہار خان نے کہا کہ گلگت بلتستان میں جنرل نرسز کی کمی ہے، سندھ حکومت کا ہیلتھ سیکٹر میں کام بہت زبردست ہے۔

وزیراعلیٰ گلگت بلتستان اور وزراء نے پیپلز پارٹی کی گلگت بلتستان کی خدمات کو سراہا۔

ہیلتھ سیکٹر کی تعریف کرنے پر وزیراعلیٰ سندھ نے وزیراعلیٰ گلگت بلتستان کا شکریہ ادا کیا۔