پی ایس او کا مالی بحران برقرار،  مختلف سیکٹر پر مجموعی واجبات 800 ارب روپے ہوگئے۔

 ذرائع پی ایس او کے مطابق درآمدی ایل این جی کے واجبات 515 ارب روپے ہوگئے، جبکہ سوئی نادرن گیس کمپنی نے درآمدی ایل این جی کی مد میں 515 ارب 28 کروڑ  روپے ادا کرنا ہیں۔

 ذرائع کا کہنا ہے کہ پاور سیکٹر نے پی ایس او کو 189ارب روپے جبکہ پی آئی اے نے 29 ارب 25 کروڑ روپے  ادا کرنے ہیں۔

ذرائع پی ایس او نے بتایا کہ ایکسچینج ریٹ کے فرق کی مد میں واجبات 57 ارب 31 کروڑ روپے ہوچکے ہیں، اس کے علاوہ پی ایس او نے مقامی ریفائیرز  اور درآمدی پیٹرولیم مصنوعات کی مد میں ادائیگی بھی  کرنا ہیں۔

ذرائع کے مطابق  پی ایس او نے متعلقہ وزارتوں سے 50 ارب روپے  واجبات کی رقم مانگ لی ہے، جبکہ گردشی قرضوں کا بحران پی ایس او کے منافع کو نمایاں طور پر متاثر کررہا ہے۔

 پی ایس او نے مزید یہ بھی کہا کہ سب سے زیادہ درآمدی ایل این جی کے واجبات سوئی نادرن گیس کمپنی پر پہنچ چکے ہیں، جبکہ پی ایس او  کے حبکو پر بھی  14 ارب 80 کروڑ روپے کے واجبات ہیں۔