کراچی ایکسپو سینٹر میں بارہویں بین الاقوامی دفاعی نمائش آئیڈیاز 2024 کا آج آخری روز ہے۔

ملکی غیر ملکی دفاعی ماہرین اور صنعت کاروں کی کراچی ایکسپو سینٹر آمد جاری ہے، اعلیٰ عسکری و سیاسی قیادت نمائش میں بھرپور حصہ لے رہی ہے۔

گزشتہ روز نشان پاکستان سی ویو کراچی پر شاندار شو ہوا، وزیراعلیٰ سندھ مرادعلی شاہ مہمان خصوصی تھے جبکہ گورنرسندھ کامران ٹیسوری نے بھی شو میں شرکت کی۔

پاک فضائیہ کے پائلٹس نے کمال مہارت کا مظاہرہ کیا جبکہ پاک بحریہ کے سی کنگ، زولونائنر اور ایلوٹ ہیلی کاپٹرز نے بھی پیشہ ورانہ صلاحیت کا مظاہرہ کیا۔

سی ون تھرٹی طیارے سے ہزاروں فٹ کی بلندی سے فری فال پیرا جمپ نے دیکھنے والوں کو دنگ کردیا۔

بعدازاں ایئر چیف مارشل ظہیر احمد بابر نے بھی نمائش کا دورہ کیا، ایئرو اسپیس ٹیکنالوجی اورفضائی دفاع سے متعلق سازوسامان کے اسٹالز کا دورہ کیا اور اسٹاف کے کام کو سراہا۔