اسلام آباد: وفاقی وزیر تجارت جام کمال خان اور فن لینڈ کے سفیر ہینو ریپاتی کے درمیان ملاقات میں تجارتی تعلقات میں اضافے اور نئے شعبوں میں تعاون پر غور کیا گیا ہے۔

وفاقی وزیر تجارت جام کمال خان اور فن لینڈ کے سفیر ہینو ریپاتی کے درمیان ملاقات ہوئی جس میں پاکستان اور فن لینڈ کے درمیان تجارتی تعلقات کو مزید مضبوط بنانے پر تبادلہ خیال کیا گیا جب کہ تجارتی تعلقات میں اضافے اور نئے شعبوں میں تعاون پر بھی غور کیا گیا۔

وزیر تجارت نے غیر فعال شعبوں کو فعال کرنے اور تجارتی فوائد کو بڑھانے پر زور دیا، ملاقات میں تعلیم، آئی ٹی، ٹیکسٹائل، صحت اور تعمیرات میں تعاون کے مواقع پر بات چیت ہوئی۔

فن لینڈ کے ممکنہ حکومتی وفد کے پاکستان کے دورے سے معاہدے مضبوط ہونے کا امکان ہے۔ نیشنل کمپلائنس کونسل  کا قیام، پاکستانی مصنوعات کے عالمی معیار پر پورا اترنے کے لیے اہم ہے۔

فن لینڈ کے سفیر نے پاکستانی انجینئرز کی صلاحیتوں اور عالمی مارکیٹ میں مانگ پر اعتماد کا اظہار کیا۔

وزیر تجارت جام کمال خان نے کہا کہ پاکستان کی سستی اور تربیت یافتہ افرادی قوت کو فن لینڈ کی صنعتوں میں بروئے کار لایا جاسکتا ہے۔

اس موقع پر وزیر تجارت کو فروری 2025 میں فن لینڈ پاکستان بزنس فورم میں شرکت کی دعوت دی گئی۔

فن لینڈ اور پاکستان کے مابین تعلیم، صحت، اور انفارمیشن ٹیکنالوجی جیسے شعبوں میں تعاون کی توقع ہے جب کہ دونوں ممالک کے درمیان تجارتی تعلقات میں توسیع پر خوشی کا اظہار کیا گیا ہے۔