لندن: جمعیت علمائے اسلام کے سربراہ مولانا فضل الرحمان نے کہا ہے کہ جمہوریت کی کمزوری میں سیاستدانوں کا بڑا کردار ہے۔

جے یو آئی کے سربراہ مولانا فضل الرحمان نے لندن میں میڈیا سے گفتگو کرتے ہوئے کہا کہ کسی سیاستدان کو قید کرنے کے حق میں نہیں، ہمیشہ آئین اور جمہوریت پر شب خون مارا گیا، سیاستدانوں نے اپنے مفادات کیلئے جمہوریت پر سمجھوتہ کیا۔

انہوں نے کہا کہ برطانیہ خواجہ آصف کے معاملے میں قانون کے مطابق کارروائی کرے، نئے قانون کے ذریعے ملک کے ہر شہری کو مشکوک بنادیا گیا۔

مولانا فضل الرحمان نے مزید کہا کہ امریکہ میں ریپبلکن حکومت ہو یا ڈیموکریٹس، دنیا کیلئے پالیسی ایک ہے، نہ ہم امریکی سیاست میں مداخلت کرتے ہیں نہ انہیں اجازت دے سکتے ہیں۔