وائرلیس اینڈ انٹرنیٹ سروس پرووائیڈرز نے وی پی این رجسٹریشن کی تاریخ میں توسیع کا مطالبہ کردیا۔

چیئرمین وائرلیس اینڈ انٹرنیٹ سروس پرو وائیڈرز ایسوسی ایشن نے سیکرٹری داخلہ کو خط لکھتے ہوئے وی پی اینز کو ریگولیٹ کرنے کی حکومتی کوششوں کی تعریف کی۔

انہوں نے خط میں لکھا کہ وی پی اینز کی رجسٹریشن کا عمل آسان کرنے سے شہریوں، فری لانسرز اور کاروبار کو سہولت ہوئی، پہلے سے جاری عمل میں حساس معلومات سے متعلق پائے جانے والے خدشات دور ہوئے۔

خط میں کہا گیا ہے کہ فری لانسرز اور شہریوں نے بغیر کسی ہچکچاہٹ وی پی این رجسٹریشن کا عمل شروع کردیا، ایسوسی ایشن اپنے ممبران کو وی پی این استعمال کا محفوظ راستہ اپنانے کی ترغیب دی رہی ہے۔

خط میں یہ بھی کہا گیا ہے کہ وی پی این رجسٹریشن کے عمل سے متعلق شہریوں کو آگاہی دینے کی ضرورت ہے، سروس پرووائیڈرز آئی ٹی انڈسٹری کے ساتھ مل کر وی پی این رجسٹریشن کا عمل مزید آسان کرسکتے ہیں۔

وائرلیس اینڈ انٹرنیٹ سروس پرو وائیڈرز ایسوسی ایشن نے خط میں مزید لکھا کہ پہلے سے شکوک و شبہات میں صارفین کا اعتماد بحال کرنے کی ضرورت ہے، رجسٹریشن کی تاریخ میں توسیع حکومت کے مقاصد کے حصول میں مددگار ثابت ہوگی۔