وزیراعلیٰ سندھ سید مراد علی شاہ نے کہا ہے کہ رواداری سے ہی مختلف برادریوں میں بھائی چارہ قائم ہے۔

وزیراعلیٰ سندھ سید مراد علی شاہ نے عالمی یوم رواداری کے موقع پر پیغام جاری کرتے ہوئے کہا کہ آج 16 نومبر بین الاقوامی طور پر رواداری کا دن منایا جاتا ہے۔

انہوں نے کہا کہ انسانی حقوق اور آزادی کو تسلیم کرنا اور ایک دوسرے کے نقطہ نظر کا احترام کرنا رواداری ہے، ہماری ثقافت میں رواداری نمایاں ہے، اس لیے سندھ دہرتی پر تمام مذاہب اور مختلف سوچ کے لوگ بھائی چارے سے رہتے ہیں۔

ان کا کہنا تھا کہ اسلام نے ہمیشہ رواداری اور حسن سلوک کا حکم دیا ہے، ہمیں ہر مذہب اور نظریہ کا احترام کرنا ہے۔

سید مراد علی شاہ نے کہا کہ مذہب، تہذیب، ثقافت، زبان یا رنگ و نسل میں اختلاف کے باوجود عدل و انصاف کرنا رواداری ہے، رواداری سے ہی مختلف برادریوں میں بھائی چارہ قائم ہے۔

وزیراعلیٰ سندھ کا مزید کہنا تھا کہ ہم چاہتے ہیں کہ سماج میں رواداری کو مزید فروغ دینے کے لیئے اہل علم اور اہل قلم اپنا کردار ادا کریں۔