لاہور: وزیراعلیٰ پنجاب مریم نواز شریف نے عوام کو علاج کی بہترین سہولتیں دینے کے عزم کا اظہار کیا ہے۔

پنجاب بھر میں تمام مراکز صحت کی بیک وقت ری ویمپنگ کا ریکارڈ تکمیل کے قریب پہنچ چکا ہے، مراکز صحت کی بوسیدہ عمارتیں چمچماتے کلینکس میں تبدیل ہوں گی۔

پنجاب کے 1236 مراکز صحت کی ری ویمپنگ اور بحالی کا پراجیکٹ تیزی سے جاری ہے جبکہ وزیراعلیٰ مریم نواز نے تمام مراکز صحت کی ری ویمپنگ کے لئے 31 دسمبر کی ڈیڈ لائن مقرر کر دی۔

ری ویمپنگ پراجیکٹ میں سنٹرل پنجاب کے 286، نارتھ زون کے 363 اور جنوبی پنجاب کے 587 مراکز صحت شامل ہیں، وسطی پنجاب کے مراکز صحت کی 30 فیصد، شمالی زون کی 28 فیصد اور جنوبی پنجاب کی 25 فیصد سے زائد کی ری ویمپنگ مکمل کر لی گئی۔

پنجاب بھر میں 1219 مراکز صحت کو فیملی کلینکس کی شکل دینے کا کام تیزی سے جاری ہے، محکمہ تعمیرات مواصلات کی ٹیمیں مراکز صحت کی  تکمیل کے لئے سرگرم عمل ہیں۔

اس موقع پر وزیراعلیٰ مریم نواز نے گفتگو کرتے ہوئے کہا کہ عوام کو علاج کی بہترین سہولتوں کا کیا گیا وعدہ پورا کریں گے، بنیادی مراکز صحت کو  جدید ترین کلینکس میں بدلیں گے، ڈاکٹروں اور اسٹاف کی کمی بھی پوری ہوگی۔

انہوں نے کہا کہ پنجاب کے دیہات میں ایسے کلینک بنائیں گے جو پرائیویٹ اسپتالوں سے بھی بہترہوں گے، عوام کی دہلیز پر صحت کی بہترین سہولتیں فراہم کرنے سے بڑے اسپتالوں پر مریضوں کا رش کم ہوگا۔

وزیراعلیٰ مریم نواز شریف نے مراکز صحت کی ری ویمپنگ پلان میں تعمیراتی معیار یقینی بنانے کی بھی ہدایت دے دی۔