میئر کراچی بیرسٹر مرتضیٰ وہاب نے کہا کہ عوام کسی بھی غیرقانونی کارروائی کا حصہ نہ بنیں۔

میئر کراچی بیرسٹر مرتضیٰ وہاب کی صدارت میں محکمہ کچی آبادی کا اجلاس ہوا جس میں حسرت موہانی کالونی، محمود آباد نالے، غوثیہ کالونی میں ہونے والی غیرقانونی تعمیرات کا نوٹس لے کر فوری کارروائی کا حکم دے دیا۔

مرتضیٰ وہاب نے کہا کہ کچی آبادیوں میں غیر قانونی طور پر تعمیرات کو فوری طور پر روک دیا گیا ہے، کسی بھی غیرقانونی تعمیر، لیز اور دیگر معاملات میں وہ اپنے نقصان کے خود ذمہ دار ہوں گے۔

 میئر کراچی نے کہا کہ کے ایم سی کی 202 کچی آبادیوں کے نقشہ جات کے ایم سی کی ویب سائٹ پر جاری کردیئے جائیں، پبلک پراپرٹی عوام کے لیے ہے اور اس سے متعلق تمام عمل شفاف ہونا چاہئے۔

انہوں نے کہا کہ نالوں پر کسی بھی قسم کی تعمیرات غیرقانونی ہیں انہیں فوری روکا جائے، کچی آبادیوں میں کثیر المنزلہ عمارات، پیٹرول پمپس، سی این جی اسٹیشنز بنانا غیرقانونی ہیں۔

ان کا یہ بھی کہنا تھا کہ کچی آبادیوں میں غیرقانونی تعمیرات کے خلاف فوری کارروائی شروع کی جائے، چالیس سالوں میں جو اس شہر کے ساتھ ہوا وہ ناقابل برداشت ہے، جبکہ کے ایم سی کے مفاد میں کام کرنے والے افسران کا پورا ساتھ دیا جائے گا۔

میئر کراچی نے کہا کہ آج کے بعد جو لوگ غیرقانونی کاموں میں ملوث ہوں گے ان کے خلاف اینٹی کرپشن میں مقدمات کے ساتھ انہیں نوکری سے بھی برخاست کیا جائے گا، ایس ایل جی اے 2013 کے تحت کے ایم سی کے پاس یہ اختیارات موجود ہیں کہ وہ غیرقانونی تعمیرات کو منجمد کرے، جرمانے عائد کرے اور ان تعمیرات کو مسمار کرسکے۔

اجلاس میں میونسپل کمشنر افضل زیدی، مشیر مالیات گلزار علی ابڑو، سینئر ڈائریکٹر کچی آبادی فراز انور شیخ اور متعلقہ تمام افسران کی شرکت کی۔