اسلام آباد: ایرانی وزیر خارجہ سید عباس عراقچی نائب وزیراعظم اور وزیر خارجہ اسحاق ڈار سے بات چیت کے لیے دفتر خارجہ پہنچ گئے۔

نائب وزیراعظم اسحاق ڈار نے دفتر خارجہ آمد پر ایرانی وزیر خارجہ اور ان کے وفد کا استقبال کیا۔

اس موقع پر اسحاق ڈار اور ایرانی وزیر خارجہ نے دو طرفہ تعلقات، مشرق وسطی کی صورتحال اور علاقائی امور پر تبادلہ خیال کیا۔

ملاقات کے دوران پاک ایران وزرائے خارجہ نے دیرینہ تعلقات کے پس منظر میں دو طرفہ روابط، تجارت، توانائی اور بارڈر مینجمنٹ کے ذریعے دو طرفہ تعلقات کو مزید مضبوط بنانے پر زور دیا۔

پاک ایران وزرائے خارجہ نے تجارت سرمایہ کاری اور عوامی رابطوں کو فروغ دینے کے لیے عزم کا اعادہ کیا اور فلسطینی عوام کے خلاف اسرائیلی جارحیت کی شدید مذمت کرتے ہوئے فلسطینی عوام کے حق خود ارادیت کی حمایت کے عزم کا اظہار کیا۔