اتحاد  تنظیمات مدارس دینیہ نے مدارس رجسٹریشن بل کا گزٹ نوٹیفکیشن فوری جاری کرنے کا مطالبہ کردیا۔

تفصیلات کے مطابق اسلام آباد میں اتحاد تنظیمات مدارس دینیہ کا اجلاس ہوا جس میں مفتی منیب الرحمان، مفتی تقی عثمانی سمیت جید علمائے کرام  و دیگر معززین نے شرکت کی۔

اجلاس کے اعلامیے میں قائدین نے حکومت سے مطالبہ کیا کہ مدارس بل  ایکٹ بن چکا ہے، فوری طور پر گزٹ نوٹیفکیشن جاری کیا جائے۔ حکومت نے اگر کوئی ترمیم کرنی ہے تو گزٹ نوٹیفکیشن کے بعد اس پر مشاورت کی جا سکتی ہے۔

اجلاس میں صدر مملکت کی جانب سے مدارس بل پر دستخط نہ کرنے پر شدید تشویش کا اظہار کیا گیا۔

اجلاس کے بعد مولانا فضل الرحمان نے مفتی تقی عثمانی اور مفتی منیب و دیگر کے ہمراہ مشترکہ پریس کانفرنس کی اور کہا کہ مدارس بل متنازع نہیں کیونکہ پارلیمنٹ نے اس کی منظوری دی ہے، کیا بل منظور ہونے کے بعد کوئی سوال اٹھایا گیا؟ ہمارے مطابق یہ بل ایکٹ بن چکا ہے۔

مولانا فضل الرحمان نے کہا کہ اس مسئلے کا ذاتی مراسم سے کوئی تعلق نہیں ہے۔  اس بل کے حوالے سے حکومت کی طرف سے ڈرافٹ لایا گیا، ہم نے 26 ویں ترمیم کے موقع پر اس بل کی بات کی۔اس بل میں تبدیلی ہم نے نہیں ان ہی لوگوں نے لائی ہے،اس بل پر ان کی جانب سے کوئی اعتراض نہیں اٹھایا گیا۔

انہوں نے مزید کہا کہ ہم اس مسئلے کو سادگی سے حل کرنا چاہتے ہیں، ہم قانونی اور آئینی طریقے سے پرامن طور پر اس مسئلے کو حل کرنا چاہتے ہیں، ہمارا پیغام سب کو پہنچ گیا ہو گا۔

مفتی منیب الرحمان

مفتی منیب الرحمان نے پریس کانفرنس میں کہا کہ  اتحاد تنظیمات مدارس کی سپریم کونسل کے اجلاس میں موجودہ صورتحال پر تفصیلی غور کیا  اور اتفاق رائے سے قرارداد منظور کی گئی۔

انہوں نے کہا کہ صدر مملکت کی جانب سے دس دن میں بل پر کوئی اعتراض نہیں لگایا گیا، 13نومبر کو نئے اعتراضات لگائے گئے۔ دس دن کی مدت گزرنے کے بعد اعتراض نہ کرنے کے بعد یہ بل قانون کی شکل اختیار کر گیا ہے۔

مفتی منیب الرحمان نے کہا کہ صدر نے میعاد گزرنے کے بعد نئے اعتراضات لگائے۔یہ بل اب قانونی شکل اختیار کرچکا ہے،حوالے کیلئے سپریم کورٹ پریکٹس اینڈ پروسیجر بل موجود ہے۔

انہوں نے کہا کہ ہمارا مطالبہ ہے قانون کے مطابق اس کا گزٹ نوٹیفکیشن جاری کیا جائے۔ اگر ہمارا مطالبہ نا مانا گیا تو ہم اگلہ لائحہ عمل طے کریں گے۔

مفتی منیب الرحمان کا کہنا تھا کہ حالات کو بگاڑنا کسی کے بھی حق میں بہتر نہیں ہے،ہم اس مسئلے کو حل کرنا چاہتے ہیں۔