اسلام آباد: وفاقی وزیر پرائیویٹائزیشن عبدالعلیم خان نے نجکاری کے تمام منصوبوں پر شفافیت کے ساتھ کام کو مزید تیز کرنے کی ہدایت کردی۔

وفاقی وزیر نجکاری، سرمایہ کاری بورڈ اور مواصلات عبدالعلیم خان کی زیر صدارت پرائیویٹائزیشن کمیشن بورڈ کا اجلاس منعقد ہوا جس میں مختلف اداروں کی پرائیویٹائزیشن کے امور پر غوروخوض اور اہم سفارشات پیش کی گئیں۔

پرائیویٹائزیشن کمیشن بورڈ کے 229 ویں اجلاس میں گذشتہ بورڈ اجلاس کی کارروائی کی بھی منظوری دے دی گئی جب کہ وفاقی وزیر پرائیویٹائزیشن عبدالعلیم خان نے نجکاری کے تمام منصوبوں پر شفافیت کے ساتھ کام کو مزید تیز کرنے کی ہدایت کردی۔

بورڈ اجلاس میں پرائیویٹائزیشن کے لئے فنانشل ایڈوائزرز کی تقرری سمیت اہم تکنیکی امور پر ہونے والی پیش رفت پر غور کیا گیا۔

اجلاس کے دوران وفاقی وزیر عبدالعلیم خان نے کہا کہ اداروں کی نجکاری قوانین و ضوابط کے مطابق ہونا ہے، خلاف ضابطہ کچھ بھی نہیں ہوسکتا۔

عبدالعلیم خان کا کہنا ہے کہ اداروں کی نجکاری کا مقصد ملکی خزانے پر مستقل پڑنے والے بوجھ سے نجات دلانا ہے جب کہ پی آئی اے کی نجکاری کے لئے گزشتہ کارروائی کی روشنی میں بہتر اور مختلف حکمت عملی اور نئی سفارشات پر بھی غور کیا گیا۔

وفاقی وزیر نے ہدایت دیتے ہوئے کہا کہ پی آئی اے کی نجکاری اب زیادہ آسان اور پرکشش بنادی گئی ہے، ڈسکوز کی نجکاری کے لئے وزارت توانائی سے ایک ہفتے میں امور کو حتمی شکل دے دی جائے۔