اسلام آباد: چیئرمین سینیٹ سید یوسف رضا گیلانی نے کہا ہے کہ علاج معالجے کی سہولیات شہریوں کا بنیادی حق ہے۔

یوسف رضا گیلانی نے تقریب سے خطاب کرتے ہوئے کہا کہ کسی بھی معاشرے میں صحت کا شعبہ اہمیت کا حامل ہوتا ہے۔

انہوں نے کہا کہ عوام کو صحت سے متعلق آگاہی کی فراہمی ضروری ہے، علاج معالجے کی سہولیات شہریوں کا بنیادی حق ہے۔

چیئرمین سینیٹ نے کہا کہ دیہی علاقوں میں صحت کی سہولیات یقینی بنانا ضروری ہے، صحت مند افراد سے ہی صحت مند معاشرہ تشکیل پاتا ہے۔

انکا کہنا تھا کہ صحت اور تعلیم میرے اجداد کے نزدیک کے قریب بہت اہم رہی ہے، اس وقت سے آج تک ہم تعلیم کیلئے کام کررہے ہیں، بی زیڈ یو کالج کی بنیاد میرے والد نے رکھی تھی، وہاں اعلیٰ معیار کے پروفیسرز اور انفسٹکچر موجود ہیں، میرے والد نے بطور وزیر صحت بہت سے منصوبے شروع کیے۔

یوسف رضا گیلانی نے کہا کہ آئینی ترامیم کے مطابق صحت اور تعلیم اب صوبوں کو شفٹ ہوچکے ہیں، اب صوبوں کی صوبدید ہے کہ وہ کس سیکٹر کو زیادہ ترجیع دیتے ہیں۔

انہوں نے مزید کہا کہ تعلیم بہت بڑا اثاثہ ہے دنیا چاند تک پہنچ چکی ہے، ہمیں بھی اپنے نوجوانوں کو جدید تعلیم سے آراستہ کرنا ہوگا، یتیم وہ نہیں جس کے والدین نہیں بلکہ وہ ہے جس کے پاس تعلیم نہیں ہے، اثر حاضر کا تقاضہ ہے کہ دنیا کے ساتھ جدید تعلیم کی طرف جایا جائے۔