صدر مملکت آصف علی زرداری نے پاکستان کرکٹ ٹیم کو جنوبی افریقہ کے خلاف ون ڈے سیریز جیتنے پر مبارکباد دی ہے۔

صدر آصف زرداری نے اپنے جاری کردہ بیان میں کہا کہ پاکستان کرکٹ ٹیم نے پوری سیریز کے دوران بہترین کارکردگی کا مظاہرہ کیا۔

انہوں نے پاکستان کرکٹ ٹیم کے مستقبل کے لیے نیک تمناؤں کا اظہار کیا اور کہا کہ امید ہے کہ پاکستان کرکٹ ٹیم مستقبل میں بھی اچھے کھیل کا مظاہرہ کرے گی۔

وزیراعظم شہباز شریف

دوسری جانب وزیراعظم محمد شہباز شریف نے جنوبی افریقہ کے خلاف ون ڈے کرکٹ سیریز میں شاندار فتح پر قومی کرکٹ ٹیم کو خراج تحسین پیش کیا اور پوری قوم کو مبارکباد دیتے ہوئے کہا کہ قومی ٹیم نے پوری سیریز کے دوران بہترین کھیل پیش کیا اور سیریز کے تمام میچ اپنے نام کیے۔

وزیراعظم نے چیئرمین پاکستان کرکٹ بورڈ سید محسن رضا نقوی اور ٹیم مینجمنٹ کی کارکردگی کی تعریف بھی کی اور کہا کہ امید ہے مستقبل میں بھی کامیابیوں کا یہ سلسلہ جاری رہے گا۔