وزیر اعلیٰ پنجاب مریم نواز شریف نے کہا کہ عوام نئے سال کی خوشیوں کو  سماجی ذمہ داری سے منائیں۔

وزیر اعلیٰ پنجاب مریم نواز شریف نے  نئے سال کے حوالے سے فول پروف سیکورٹی انتظامات کی ہدایت دیتے ہوئے کہا کہ عوامی مقامات، پارکس، شاپنگ مالز، اور دیگر  مقامات پر سیکیورٹی کو فول پروف بنایا جائے۔

مریم نواز نے عوام کے جان و مال کا تحفظ  یقینی بنانے کے لیے سیکیورٹی  مزید سخت کرنے کا حکم دیتے ہوئے کہا کہ پولیس اور انتظامیہ عوام کے تعاون سے ہر قسم کے غیر قانونی اقدامات کی روک تھام یقینی بنائے۔

انہوں نے یہ بھی کہا کہ کسی بھی غیر قانونی سرگرمی پر فوری کارروائی کی جائے، نوجوان ہوائی فائرنگ اور دیگر خطرناک سرگرمیوں سے گریز کریں، قانون کی خلاف ورزی کرنے اور قیمتی انسانی جانوں کو بھی خطرے  ڈالنے والوں کے خلاف قانون حرکت میں آئے گا۔

مریم نواز نے کہا کہ ذمہ دار شہری ہونے کا ثبوت دیں اور قانون نافذ کرنے والے اداروں کے ساتھ تعاون کریں، شراب کی  تیاری وخرید و فروخت پر پابندی  کے ایس او پیز پر عملدرآمد نہ کرنے والوں کے خلاف کارروائی ہوگی۔

وزیر اعلیٰ پنجاب نے کہا کہ نئے سال کا آغاز  خوشگوار اور پرامن ماحول میں کرنا چاہیے۔