کراچی: سندھ کے سینئر وزیر شرجیل انعام میمن نے کہا ہے کہ پاکستان کا معاشی حب کراچی سمیت پورا صوبہ سندھ گیس کی لوڈشیڈنگ کا متحمل نہیں ہو سکتا۔

شرجیل انعام میمن نے اپنے جاری کردہ بیان میں کہا کہ گیس کی لوڈشیڈنگ کا مسلسل مسئلہ تشویشناک حد تک پہنچ گیا ہے، عوام کو شدید مشکلات کا سامنا ہے، گیس کی لوڈشیڈنگ سے روزمرہ کی زندگی اور صنعتی سرگرمیاں متاثر ہو رہی ہیں۔

انہوں نے کہا کہ پاکستان کا معاشی حب کراچی سمیت پورا صوبہء سندھ گیس کی لوڈشیڈنگ کا متحمل نہیں ہو سکتا، گیس کی مسلسل فراہمی کی کمی نے عوام میں بڑے پیمانے پر بے یقینی اور مایوسی پیدا کر دی ہے۔

صوبائی وزیر کا کہنا تھا کہ وفاقی حکومت اس مسئلے سے نمٹنے کے لیے فوری اور ٹھوس اقدامات کرے، سردیوں کے مہینوں میں وفاقی حکومت گیس کی بلا تعطل فراہمی کو یقینی بنائے۔

شرجیل انعام میمن نے مزید کہا کہ وفاقی حکومت کی ذمہ داری ہے کہ قدرتی وسائل کی منصفانہ تقسیم کو یقینی بنائے، وزیر اعظم اور وفاقی حکومت سے مطالبہ کرتے ہیں کہ وہ اس معاملے کو ترجیح دیں۔