مشیر خزانہ خیبرپختونخوا مزمل اسلم نے وفاقی وزیر خزانہ محمد اورنگزیب کو اے آئی پی فنڈز جاری کرنے کیلئے خط لکھ دیا۔

خط کے متن میں کہا گیا کہ اے آئی پی پروگرام کے تحت دوسرے کوارٹر کے 8.46 ارب روپے کے ترقیاتی فنڈز جلد جاری کیے جائیں تاکہ ضم اضلاع میں اے آئی پی کے تحت ترقیاتی سرگرمیاں متاثر نہ ہوں۔

مزمل اسلم نے خط میں بتایا کہ وفاقی حکومت نے رواں سال کیلئے اے آئی پی کے تحت ضم اضلاع کو 42.315 ارب روپے کے فنڈز مختص کیے ہیں، اب تک صرف 15 فیصد فنڈز پہلے کوارٹر کے جاری کیے گئے۔

خط میں کہا گیا کہ دوسرا کوارٹر ختم ہونے والا ہے پالیسی کے مطابق 20 فیصد فنڈز جاری کیے جائیں، پالیسی میں پی ایس ڈی پی مختض ترقیاتی بجٹ کے فنڈز کا اختیار پلاننگ ڈیویلپمنٹ ڈویژن کو دیا۔

مشیر خزانہ نے خط میں بتایا کہ پالیسی کے مطابق 15 فیصد پہلے کوارٹر، 20 فیصد دوسرے کوارٹر، 25 فیصد تیسرے اور 40 فیصد چوتھے کوارٹر میں ریلیز کیے جائیں گے۔

مزمل اسلم نے وفاقی وزیر خزانہ کو خط میں کہا کہ پہلے کوارٹر کے 15 فیصد ریلیز کیے گئے ہیں اور دوسرا کوارٹر ختم ہونے والا ہے فنڈز ریلیز کیے جائیں۔