وفاقی وزیر احسن اقبال نے کہا کہ دھرنے اور لانگ مارچ ملکی معیشت کیلئے زہر ہیں۔

وفاقی وزیر احسن اقبال نے نارووال میں تقریب سے خطاب کرتے ہوئے کہا کہ زرعی شعبے میں پالیسی سازی کے لیے اعداد وشمار اہم ہیں، زراعت شماری پاکستان کی زرعی ترقی کےلیے اہم قدم ہے۔

احسن اقبال نے کہا کہ پاکستان کی 60 فیصد سے زائد آبادی زراعت پر منحصرہے، پاکستان میں حال ہی  میں ڈیجیٹل مردم شماری کی گئی ہے۔

انہوں نے کہا کہ ہمارے پاس وسائل کم ہیں، آبادی دگناہوگئی تومہنگائی کاکیاہوگا؟ 77سالوں میں ملک میں سیاسی استحکام نہیں آیا،  جب ملک چلنےلگتا ہے حکومت کو گرادیا جاتا ہے، ملک ترقی کی راہ پرچلنے لگے تواندرونی سازش کردی جاتی ہے۔

احسن اقبال نے کہا کہ ملک میں اصلاحات اورسیاسی استحکام کی ضرورت ہے، 24 نومبر کو دھرنا کال سے اسٹاک مارکیٹ 4 ہزارگری۔

انہوں نے کہا کہ پی ٹی آئی دور میں اسٹاک ایکسچینج 27 ہزار کراس نہیں کرتی تھی، آج اسٹاک ایکسچینج میں کاروبارایک لاکھ انڈیکس سےزیادہ رہتا ہے۔

احسن اقبال نے مزید یہ بھی کہا کہ زرعی شماریات سےجدید زرعی معیشت کوفروغ ملےگا،  آئندہ 5 سال میں ملک میں زراعت کوجدید خطوط پراستوارکریں گے۔