پاکستان اور آذربائیجان کے درمیان تجارتی تعلقات کو وسعت دینے کیلئے رجسٹرڈ آزری گاڑیوں اور کارگوز کو پاکستان میں داخلے کی اجازت دینے کا فیصلہ کیا گیا ہے۔

ایف بی آر نے آذربائیجان پاکستان ٹریڈ ایگریمنٹ 2024 کے تحت ایس آر او جاری کر دیا جس کے مطابق دوطرفہ تجارتی سامان لے جانے کیلئے آذر گاڑیوں کو پاکستان میں داخلے کی اجازت ہوگی۔

جاری کردہ ایس آر او کے مطابق کسٹمز کمپیوٹرائزڈ سسٹم کے تحت مخصوص بندرگاہوں سے بھی پراسسینگ ہو سکے گی، جبکہ آذر بائیجان سے رجسٹرڈ گاڑیاں درست اجازت نامے کے ساتھ پاکستان آ سکیں گی، یہ گاڑیاں ٹرانزٹ اور دوطرفہ تجارتی سامان کی نقل و حمل کیلئے استعمال ہوتی ہیں۔

ایس آر او میں بتایا گیا کہ دونوں ممالک کے درمیان معاہدے کے تحت فنانس انشورنس کے بغیر اجازت ہوسکے گی، پاکستان سے جانے یا داخلے کے وقت مجاز اتھارٹی کا اجازت نامہ ضروری ہوگا، جبکہ آذربائیجان سے آنے والی گاڑیوں کو متعلقہ مقامات پر اندراج ضروری ہوگا۔