پاک بحریہ کے سابق سربراہ ایڈمرل یسطور الحق ملک کو لاہور میں فوجی اعزاز کے ساتھ سپرد خاک کر دیا گیا ہے۔

پاک فوج کے شعبہ تعلقات عامہ (آئی ایس پی آر) کے مطابق سابق نیول چیف ایڈمرل یسطور الحق ملک کی نماز جنازہ میں مسلح افواج کے ریٹائرڈ اور حاضر سروس افسران اور سویلینز کی بڑی تعداد نے شرکت کی۔

آئی ایس پی آر نے بتایا کہ صدر، وزیر اعظم، چیئرمین جوائنٹ چیفس آف اسٹاف کمیٹی، مسلح افواج کے سربراہان اور بحریہ کے افسران اور جوانوں کی جانب سے ایڈمرل یسطور الحق ملک کی قبر پر پھول اور چادریں رکھی گئیں۔

ترجمان پاک فوج کے مطابق ایڈمرل یسطور الحق ملک نے 1954 میں پاک بحریہ میں کمیشن حاصل کیا، انہوں نے 1965 اور 1971 کی پاک بھارت جنگوں میں بھی حصہ لیا۔

آئی ایس پی آر نے مزید بتایا کہ مرحوم ایڈمرل 1988 سے 1991 تک پاک بحریہ کے سربراہ رہے جبکہ انہوں نے بطور کمانڈر پاکستان فلیٹ، وائس چیف آف دی نیول اسٹاف اور چیئرمین پاکستان نیشنل شپنگ کارپوریشن میں بھی فرائض سرانجام دیے۔