اسلام آباد: صدر مملکت آصف علی زرداری اور وزیر اعظم شہباز شریف سمیت مختلف رہنماؤں نے سیکیورٹی فورسز کو خیبرپختونخوا میں 3 کامیاب کارروائیوں پر خراج تحسین پیش کیا ہے۔

آئی ایس پی آر کے مطابق سیکیورٹی فروسز نے خیبرپختوںخوا کے مختلف علاقوں میں آپریشن کیا اور 3 آپریشنز کے دوران 22 خوارجی دہشتگردوں کو جہنم واصل کردیا جب کہ دوران آپریشن دہشت گردوں سے لڑتے ہوئے پاک فوج کے 6 بہادر جوانوں نے جام شہادت بھی نوش کیا۔

صدر مملکت آصف علی زرداری، وزیر اعظم شہباز شریف اور وزیر داخلہ محسن نقوی سمیت وزیر اعلیٰ سندھ نے سیکیورٹی فورسز کو خیبرپختونخوا میں 3 کامیاب کارروائیوں پر خراج تحسین پیش کیا ہے۔

صدر پاکستان کا بیان

صدر مملکت نے خیبرپختونخواہ کے تین اضلاع میں خوارج کے خلاف کامیاب کارروائیوں کی تعریف کرتے ہوئے کہا کہ فورسز نے 22 دہشت گردوں کو جہنم واصل کرکے اہم کامیابی حاصل کی۔

صدر مملکت نے کہا کہ سیکیورٹی فورسز کی بہادری قابل تحسین ہے اور یہ کارروائیاں دہشت گردوں کے مکمل خاتمے تک جاری رہیں گی۔

انہوں نے دہشت گردوں کے خلاف آپریشنز کے دوران شہید ہونے والے 6 فوجی جوانوں کو خراج عقیدت پیش کیا اور ان کی قربانیوں کو سراہا۔

وزیراعظم کا ردعمل

وزیراعظم پاکستان شہباز شریف نے بھی سیکیورٹی فورسز کی کامیاب کارروائیوں پر ان کی تعریف کی اور کہا کہ 22 دہشت گردوں کو ہلاک کرنا ایک بڑی کامیابی ہے۔

وزیراعظم نے شہید جوانوں کو خراج عقیدت پیش کرتے ہوئے کہا کہ وطن کی خاطر اپنی جانیں قربان کرنے والے فورسز کے جوانوں کی قربانیوں کو قوم ہمیشہ یاد رکھے گی۔

انہوں نے کہا کہ دہشت گردی کے مکمل خاتمے تک سیکیورٹی فورسز کی جنگ جاری رہے گی اور پوری قوم سیکیورٹی فورسز کے شانہ بشانہ کھڑی ہے۔

وفاقی وزیر داخلہ کا بیان

وفاقی وزیر داخلہ محسن نقوی نے سیکیورٹی فورسز کی کارروائیوں کی تعریف کرتے ہوئے کہا کہ فورسز نے بروقت آپریشنز کے ذریعے دہشت گردوں کے عزائم کو ناکام بنایا اور 22 خوارجی دہشت گردوں کو عبرتناک انجام تک پہنچایا۔

انہوں نے شہید جوانوں کو خراج عقیدت پیش کرتے ہوئے ان کی قربانیوں کو سراہا اور شہداء کے لواحقین سے دلی ہمدردی کا اظہار کیا۔

وزیراعلیٰ سندھ کا بیان

وزیراعلیٰ سندھ نے بھی خیبرپختونخواہ میں سیکیورٹی فورسز کی کامیاب کارروائیوں پر ان کا شکریہ ادا کیا اور کہا کہ 22 دہشت گردوں کو جہنم واصل کرنے پر فورسز مبارکباد کی مستحق ہیں۔

انہوں نے شہید جوانوں کو خراج عقیدت پیش کرتے ہوئے کہا کہ دشمنوں کے مذموم عزائم کو خاک میں ملانے کا عزم برقرار ہے۔

وزیراعلیٰ سندھ نے اس عزم کا اظہار کیا کہ دہشت گردی کے مکمل خاتمے تک فورسز کی حمایت جاری رکھی جائے گی۔