پاکستان پیپلز پارٹی کے چیئرمین بلاول بھٹو زرداری نے کہا ہے کہ قوم دہشتگردی کے خلاف جنگ میں ثابت قدم رہے گی اور آنے والی نسلوں کو محفوظ بنائے گی۔

چیئرمین بلاول بھٹو نے سانحہِ آرمی پبلک اسکول پشاور کے شہداء کو خراجِ عقیدت پیش کرتے ہوئے کہا کہ اے پی ایس سانحہ ملکی تاریخ کے تاریک ترین ابواب میں سے ایک ہے۔

انہوں نے سانحہ اے پی ایس پشاور کی برسی پر پیغام دیتے ہوئے کہا کہ سانحہ اے پی ایس نے قوم کے ضمیر کو جھنجوڑ کر رکھ دیا اور دہشتگردی کے ناسور کے خلاف متحد کیا، شہید طلبہ اور اسٹاف ممبرز کے اہل خانہ کے حوصلے اور بہادری کو بھی سلام پیش کرتا ہوں۔

بلاول بھٹو نے کہا کہ وفاقی اور صوبائی حکومتیں نیشنل ایکشن پلان پر مؤثر عملدرآمد کو یقینی بنائیں تاکہ آئندہ ایسے سانحات سے بچا جا سکے، انتہا پسندی کے بنیادی اسباب کو تعلیم، معاشی مواقع اور سماجی ہم آہنگی کے ذریعے حل کرنا ہوگا۔

چیئرمین پی پی نے مزید کہا کہ دہشتگردی کے خاتمے اور ملک بھر میں رواداری، تعلیم اور امن کو فروغ دینے کے لیے پیپلز پارٹی پرعزم ہے، آئیے آج اِس افسوسناک دن کی برسی پر دہشتگردی سے پاک پاکستان کے لیئے اپنی جدوجہد جاری رکھنے کا عہد کریں، ایک ایسا پاکستان جہاں ہر بچہ بلاخوف و خطر خواب دیکھ سکے اور اپنی صلاحیتوں کو بروئے کار لاسکے۔