لاہور: وزیر اعلیٰ پنجاب مریم نواز شریف نے کہا ہے کہ انسانی حقوق کا تحفظ اور فروغ  مسلم لیگ (ن) کا وژن اور اولین ترجیح ہے۔

وزیر اعلیٰ مریم نواز نے انسانی حقوق کے عالمی دن پر پیغام دیتے ہوئے کہا کہ ہر انسان رنگ، نسل، مذہب، جنس یا حیثیت سے بالاتر انسانی حقوق رکھتا ہے۔

انہوں نے کہا کہ دین اسلام انسانی حقوق کا سب سے بڑا داعی ہے، انسانی حقوق کا احترام  معاشرے کی ترقی، خوشحالی کا سنگِ بنیاد ہے۔

مریم نواز نے کہا کہ انسانی حقوق کا تحفظ اور فروغ  مسلم لیگ (ن) کا وژن اور اولین ترجیح ہے، تعلیم، صحت، مذہبی آزادی، اظہارِ رائے اور بنیادی ضروریات تک رسائی یقینی بنا رہے ہیں۔

انکا کہنا تھا کہ حکومت پنجاب انسانی حقوق کی  پاسداری کے لئے  سرگرم عمل ہے، ایسے معاشرے کی تشکیل چاہتے ہیں جہاں ہر شہری کو مساوی مواقع، انصاف اور عزت حاصل ہو۔

وزیر اعلیٰ نے مزید کہا کہ انسانی حقوق کے تحفظ کے لئے معاشرے میں محبت، احترام اور رواداری کو فروغ دیں یہی راستہ خوشحالی کی طرف جاتا ہے۔