کراچی: وزیر اطلاعات سندھ شرجیل میمن نے کہا ہے کہ غیر ملکی سرمایہ کاروں کو رائیوٹ پارٹنرشپ کے تحت ہر قسم کی سہولت دینے کے لئے تیار ہیں۔

سینئر وزیر شرجیل انعام میمن نے سرمایہ کاری کانفرنس سے خطاب کرتے ہوئے کہا کہ حکومت پاکستان اور حکومت سندھ ہمیشہ سے غیر ملکی سرمایہ کاروں کو خوش آمدید کہتے ہیں، سندھ حکومت پی پی پی موڈ پر کام کر رہی ہے، ہم آپ کو بھی پرائیوٹ پارٹنرشپ کے تحت ہر قسم کی سہولت دینے کے لئے تیار ہیں۔

انہوں نے کہا کہ چینی سرمایہ کار کراچی میں میڈیکل سٹی اور ٹرانسپورٹ کے شعبے میں سرمایہ کاری کرنا چاہتے ہیں، صدر آصف علی زرداری نے سندھ حکومت کی جانب سے چینی سرمایہ کاروں کو مدد دینے کی پیشکش کی ہے۔

شرجیل انعام میمن نے کہا کہ سندھ غیر ملکی سرمایہ کاری کے لئے سب سے موزوں علاقہ ہے، ہم دو سو سال تک تھر کے کوئلے سے سستی بجلی پیدا کر سکتے ہیں۔

انکا کہنا تھا کہ گرین انرجی کے حوالے سے یہاں بہت سی کمپنیاں کام کر رہی ہیں، کارپوریٹ فارمنگ سے بھی کسانوں کو بہت فائدہ ہوگا، جدید ٹیکنالوجی کے ذریعے محدود پانی سے زیادہ زیادہ پیداوار ہو۔

صوبائی وزیر نے مزید کہا کہ چائنیز ٹیکنالوجی اور ہمارے ملک میں موجود مواقع مل کر ترقی کے مواقع پیدا کریں گے، سندھ حکومت چائنیز سرمایہ کاروں کو تحفظ فراہم کرے گی، میں چاہتا ہوں کہ ایسے مواقع ملتے رہیں۔