گجرات: مسلم لیگ ق کے صدر چوہدری شجاعت حسین نے ملک کو درپیش مسائل کے حل کے لئے فورم تشکیل دینے کا مطالبہ کردیا۔

صدر مسلم لیگ ق چوہدری شجاعت حسین کا کہنا ہے کہ ایک فورم تشکیل دیا جائے جو ملک کو درپیش مسائل کا فوری حل نکالے، صدر یا وزیراعظم فورم کی سربراہی کریں۔

انہوں نے کہا کہ تمام سیاسی جماعتوں کو فورم کا حصہ بنایا جائے، فورم باہمی مشاورت سے مسائل کے حل کے لئے تجاویز مرتب کرے۔

صدر مسلم لیگ ق نے بتایا کہ اس وقت ملک کو بڑے بڑے چیلنجز کا سامنا ہے، دہشت گردی میں اضافہ اور اس کے نتیجے میں جانوں کا ضیاع ہورہا ہے۔

چوہدری شجاعت کہتے ہیں کہ ملک کو ابتر معاشی صورتحال کا سامنا ہے، ملک میں مہنگائی عروج پر اور توانائی کا بحران ہے۔

چوہدری شجاعت حسین نے مزید کہا کہ بین الاقوامی برادری سے تعلقات میں بہتری لانے کی ضرورت ہے، مسائل کے حل کے لئے تمام فریقین کو مل کر بیٹھنے کی ضرورت ہے۔