ترجمان واٹر بورڈ کا کہنا ہے کہ کراچی میں یونیورسٹی روڈ پر پانی کی لائن کا مرمتی کام 95 فیصد مکمل ہوگیا۔

ترجمان واٹر بورڈ کے مطابق یونیورسٹی روڈ پر پانی کی لائن کا مرمتی کام آخری مراحل میں ہے، مرمتی کام اگلے 6 گھنٹوں کے اندر مکمل کرلیا جائے گا۔

ترجمان واٹر بورڈ کا کہنا ہے کہ احتیاطی طور پر لائن کی مزید مضبوطی کے لیے ایکسٹرا کالرز لگائے جارہے ہیں۔ مستقبل میں لائن کو نقصان سے بچانے کے لیے ایکسٹرا کالرز لگائے جارہے ہیں۔

ترجمان کے مطابق  32 گھنٹے تک مسلسل کام کرکے لائن کی ویلڈنگ کا کام مکمل کرلیا گیا ہے۔ لائن کی کنکریٹ کا کام بھی مکمل کرلیا گیا ہے۔

ترجمان واٹر بورڈ کا کہنا ہے کہ مرمتی کام مکمل ہونے کے فوراً بعد دھابیجی پمپنگ اسٹیشن سے پانی کی فراہمی شروع کرکے لائنوں کو چارج کیا جائے گا۔

ان کا مزید کہنا ہے کہ ڈاؤن اسٹریم کینجھر جھیل دریائے سندھ سے پانی کا لیول بڑھا دیا گیا ہے۔ دھابیجی پمپنگ اسٹیشن سے شہر تک پانی پہنچنے میں 14 گھنٹے لگتے ہیں۔ آج سے شہر میں پانی کی فراہمی بحال ہونا شروع ہو جائے گی۔