اسلام آباد: فافن نے پارلیمانی شفافیت پر فری اینڈ فیئر الیکشن نیٹ ورک کی نئی جائزہ رپورٹ جاری کردی۔

فافن کے مطابق پارلیمانی شفافیت پر فری اینڈ فیئر الیکشن نیٹ ورک کے جائزہ کو بین الپارلیمانی تنظیم کا فریم ورک مدنظر رکھ مرتب کیا گیا ہے جب کہ سینیٹ، قومی اسمبلی اور چاروں صوبائی اسمبلیوں کی ویب سائیٹس کا بھی جائزہ لیا گیا ہے۔

فافن نے بتایا کہ کچھ ویب سائٹس نے کافی معلومات دیں جب کہ دیگر تو کم از کم معیار پر ہی  پورا نہیں اتریں، آئی پی یو معیار پر سینیٹ ویب سائٹ نے سب سے زیادہ یعنی 69 فیصد عمل کیا جب کہ پنجاب اسمبلی نے 64 فیصد اور قومی اسمبلی نے 61 فیصد عمل کیا۔

فافن کا کہنا ہے کہ خیبر پختونخوا اسمبلی نے 51 فیصد، سندھ اسمبلی نے 40 فیصد اور بلوچستان اسمبلی نے 38 فیصد عمل کیا۔ یہ عدم مطابقت، سیاسی پولرائزیشن اور ماحول میں غلط معلومات کے خطرات بڑھاتی ہے۔

رپورٹ میں بتایا گیا ہے کہ ملک کی پارلیمانی ویب سائٹس گزشتہ 2 دہائیوں میں واضح ارتقائی عمل سے گزریں، اپ ڈیٹ معلومات کے لئے پارلیمانی ویب سائٹ متحرک مرکز کے طور پر ابھریں۔

فافن نے کہا کہ اسمبلیوں کی پارلیمانی قیادت کو معلومات دستیابی کے لئے عمومی معیار تیار کرنا و اپنانا چاہیے۔ پارلیمانی ویب سائٹس کی شفافیت اور افادیت بڑھانے کے لئے مزید اصلاحات ضروری ہیں۔

فافن کا مزید کہنا تھا کہ یہ اصلاحات پارلیمانی عمل میں عوامی دلچسپی بڑھانے کے لئے بھی ضروری ہیں جب کہ ایسی اصلاحات سے پارلیمانی عمل اور جمہوریت کے خلاف ڈس انفارمیشن بھی رکے گی۔