وزیر خزانہ نے ہانگ کانگ میں سروس لانگ مارچ کی قیادت سے ملاقات کی، جس میں چینی چیئرمین جن یونگ شینگ اور سی ای او عمر سعید بھی شریک تھے۔

ملاقات میں بین الاقوامی ایکویٹی کیپٹل ریزنگ کے لیے سازگار پالیسی فریم ورک پر زور دیا گیا۔

وفاقی وزیر خزانہ محمد اورنگزیب نے حکومت کی جانب سے بین الاقوامی لسٹنگ کے لیے مکمل پالیسی سپورٹ کی یقین دہانی کرائی اور بین الاقوامی مالیاتی منڈیوں میں پاکستان کی موجودگی بڑھانے کی اہمیت کو اجاگر کیا۔

ملاقات کے دوران سروس لانگ مارچ نے ہانگ کانگ اسٹاک ایکسچینج پر لسٹنگ کے عزم کا اظہار کیا، جبکہ فریقین نے بین الاقوامی تعاون کے ذریعے غیر ملکی سرمایہ کاری کے فروغ پر بھی گفتگو کی۔

وزیر خزانہ اور سروس لانگ مارچ کی قیادت نے پاکستان کیپٹل مارکیٹ کی ترقی کے لیے باہمی افہام و تفہیم پر زور دیا، تاکہ سرمایہ کاری کے مواقع کو مزید وسعت دی جا سکے۔