صوبائی ڈیزاسٹر مینجمنٹ اتھارٹی (پی ڈی ایم اے) نے خیبرپختونخوا کے بالائی اضلاع میں 18 سے 21 جنوری کے دوران گرج چمک کے ساتھ بارش اور بلند پہاڑی علاقوں میں شدید برفباری کی پیشگوئی کرتے ہوئے متعلقہ اداروں اور ضلعی انتظامیہ کو الرٹ رہنے کی ہدایت جاری کر دی ہے۔

پی ڈی ایم اے کے مطابق بارشوں اور برفباری کا یہ سلسلہ چترال، دیر، سوات، کوہستان، شانگلہ، بٹگرام، مانسہرہ، ایبٹ آباد، ہری پور، مالاکنڈ، بونیر، باجوڑ، مہمند، خیبر، اورکزئی، کرم، وزیرستان، پشاور، چارسدہ، نوشہرہ، صوابی، بنوں، کرک اور کوہاٹ میں وقفے وقفے سے جاری رہے گا۔

پی ڈی ایم اے نے تمام ضلعی انتظامیہ کو کسی بھی ممکنہ ناخوشگوار واقعے سے نمٹنے کے لیے ضروری اقدامات کرنے اور چھوٹی بڑی مشینری کی دستیابی یقینی بنانے کی ہدایت کی ہے۔

حساس بالائی علاقوں میں مقامی آبادی اور سیاحوں کو موسمی صورتحال سے باخبر رہنے اور احتیاطی تدابیر اپنانے کی تاکید کی گئی ہے۔

پی ڈی ایم اے کے جاری کردہ مراسلے میں کہا گیا ہے کہ ضلعی انتظامیہ مقامی آبادی کو موسمی خطرات سے آگاہ کرنے کے لیے پیغامات مقامی زبانوں میں پہنچائے۔

کسی بھی ہنگامی صورتحال میں تمام متعلقہ ادارے روڈ لنکس کی بحالی کو یقینی بنائیں اور سڑکوں کی بندش کی صورت میں ٹریفک کے لیے متبادل راستے فراہم کریں۔

پی ڈی ایم اے نے عوام کو ہدایت کی ہے کہ وہ بارشوں کے دوران بجلی کی تاروں، بوسیدہ عمارتوں، سائن بورڈز اور بل بورڈز سے دور رہیں۔

کسان حضرات کو بھی مشورہ دیا گیا ہے کہ وہ موسمی صورتحال کو مدنظر رکھتے ہوئے اپنے معمولات ترتیب دیں۔

سیاحتی مقامات کی جانب جانے والے افراد کو ہدایت کی گئی ہے کہ وہ روانگی سے قبل پی ڈی ایم اے کی ہیلپ لائن 1700 پر رابطہ کر کے موسم اور سڑکوں کی صورتحال کے بارے میں معلومات حاصل کریں۔

پی ڈی ایم اے کے مطابق ایمرجنسی آپریشن سنٹر مکمل طور پر فعال ہے اور عوام کسی بھی ناخوشگوار واقعے کی اطلاع پی ڈی ایم اے کی فری ہیلپ لائن 1700 پر دے سکتے ہیں۔