لاہور پولیس نے پتنگ بازی کے خلاف کریک ڈاؤن جاری رکھتے ہوئے سال کے ابتدائی 25 دنوں میں 179 مقدمات درج کیے اور 179 افراد کو گرفتار کیا۔

ڈی آئی جی آپریشنز فیصل کامران کے مطابق، پولیس نے اس دوران 36 سو سے زائد پتنگیں اور 167 چرخیاں برآمد کیں۔

فیصل کامران نے بتایا کہ پولیس نے آن لائن پتنگیں بیچنے والے گروہ اور بڑے سپلائرز کو بھی گرفتار کیا ہے۔ انہوں نے مزید کہا کہ پتنگ بنانا، بیچنا، اُڑانا یا ترسیل کرنا ناقابل ضمانت جرم ہے اور اس کی خلاف ورزی کرنے والوں کے خلاف سخت کارروائی کی جارہی ہے۔

ڈی آئی جی آپریشنز نے خبردار کیا کہ پتنگ اُڑانے والے افراد 3 سے 5 سال تک قید کی سزا کا سامنا کر سکتے ہیں۔ انہوں نے بتایا کہ لاہور پولیس پتنگ بازی ایکٹ پر مؤثر عملدرآمد کے لیے متحرک ہے، تاکہ شہر میں پتنگ بازی کے خطرات سے بچا جا سکے۔

فیصل کامران نے علماء کرام کے اس فتویٰ کا بھی حوالہ دیا جس میں پتنگ بازی کو غیر شرعی فعل قرار دیا گیا ہے اور والدین پر زور دیا کہ وہ اپنے بچوں کو پتنگ بازی سے روکنے کی مذہبی اور اخلاقی ذمہ داری ادا کریں۔

انہوں نے مزید کہا کہ شوق میں اُڑائی گئی پتنگ کسی کا گلہ کاٹ سکتی ہے، اور شہریوں سے اپیل کی کہ وہ اپنے گرد و نواح پر نظر رکھیں اور پتنگ بازی کی اطلاع فوراً پولیس ہیلپ لائن 15 پر دیں۔