لاہور: وزیراطلاعات پنجاب عظمیٰ بخاری نے کہا ہے کہ سولر پینل 200 یونٹ تک بجلی استعمال کرنے والوں کو دیے جائیں گے۔

صوبائی وزیر اطلاعات عظمیٰ بخاری نے نیوز کانفرنس کرتے ہوئے کہا کہ مریم نواز عوام کی فلاح وبہبود کے لیے بھرپور کام کررہی ہیں، زیراعلیٰ کے عوام کے لیے بہت سے منصوبے جاری ہیں۔

انہوں نے کہا کہ سولر پینلز کو شفاف طریقے سے تقسیم کیا جائے گا، ایک لاکھ سولر پینل تقسیم کیے جائیں گے، ایک لاکھ سولر پینلز منصوبے کی لاگت 10ارب روپے ہے۔

عظمیٰ بخاری نے کہا کہ سولر پینل 200 یونٹ تک بجلی استعمال کرنے والوں کو دیے جائیں گے، 100 یونٹ تک استعمال کرنے والوں کو 550 واٹ کا سسٹم دیا جائے گا، 101 سے 200 یونٹ استعمال کرنے والوں کو 1100 واٹ سولر پینل دیے جائیں گے۔

انکا کہنا تھا کہ وزیراعلیٰ مریم نواز کی کتاب میں صرف میرٹ کا ہی لفظ ہے، پنجاب کے عوام شناختی کارڈ نمبر 8800 پر بھیج کر خود کو رجسٹرڈ کرائیں، ٹیوب ویلز کی سولر ائزیشن کا بھی منصوبہ شروع کیا گیا ہے، بجلی کی قیمتوں کی وجہ سے لوگ تکلیف کا شکار رہے ہیں۔

صوبائی وزیر نے کہا کہ وزیراعلیٰ پنجاب نے مہنگائی کم کرنے کے لیے سر توڑ کوششیں کی ہیں، پنجاب حکومت نے مہنگائی کا رونا رونے کے بجائے اسے کم کر کے دکھایا، مہنگائی کی شرح موجودہ دور حکومت میں 4.1 فیصد پر آگئی ہے، مہنگائی کی شرح کم ہونے پر وزیراعظم خراج تحسین کے مستحق ہیں۔

انہوں نے مزید کہا کہ جو بچے فساد، انتشار کا ایندھن بنے انہوں نے اپنی زندگیاں تباہ کیں، معافی کے لیے ایک طرف ان کے والدین منتیں کرتے رہے، دوسری طرف باہر نکل کر جو زبان استعمال کی وہ بھی دیکھی ہے، مریم نواز انتقامی کارروائیوں پر یقین نہیں رکھتی ہیں۔