اسلام آباد: صدر مملکت آصف علی زرداری نے چین کے صدر شی جن پنگ کو خط لکھا جس میں انہوں نے چینی سال نو/ موسم بہار کے تہوار کے موقع پر چینی صدر کو مبارکباد دی۔

صدر آصف زرداری نے خط میں پاکستان اور چین کے مابین “آہنی دوستی” مضبوط بنانے کے عزم کا اعادہ کیا اور کہا کہ دوطرفہ تعاون مضبوط بنانے اور دوستی کے بندھن کو آگے بڑھانے کیلئے بیجنگ میں چینی صدر سے تبادلہ خیال کا منتظر ہوں۔

خط میں صدر نے لکھا تھا کہ پاکستان ون چائنہ پالیسی کی حمایت جاری رکھے گا، ون چائنہ پالیسی پاکستان کی خارجہ پالیسی کا اہم حصہ ہے۔

آصف زرداری کا کہنا تھا کہ دونوں ممالک کے درمیان سدابہار تزویراتی تعاون کی شراکت داری ہے، دونوں ممالک کی قیادت کی پے در پے نسلوں کی انتھک کوششوں نے بین الریاستی تعلقات کے اس منفرد اور مثالی بندھن کو پروان چڑھایا اور مضبوط کیا۔

صدر نے خط میں پاک چین تعلقات اور پاک چین اقتصادی راہداری کو آگے بڑھانے میں چینی صدر کی بصیرت انگیز قیادت کا شکریہ ادا بھی کیا اور کہا کہ چین نے سال 2024 میں مختلف شعبوں میں نمایاں پیش رفت کی۔

خط میں صدر مملکت نے پاکستان اور چین کے درمیان پائیدار اور مسلسل بڑھتی ہوئی دوستی کو سراہا اور چینی صدر کی صحت، چینی عوام کی مسلسل ترقی اور خوشحالی کے لیے نیک خواہشات کا بھی اظہار کیا۔