وزیراعظم شہباز شریف کی زیر صدارت وفاقی کابینہ کا اجلاس آج ہوگا جس میں آٹھ نکاتی ایجنڈے پر غور کیا جائے گا.

وزیراعظم شہباز شریف کی زیر صدارت وفاقی کابینہ کا اجلاس کل صبح 11 بجے ہوگا، جس میں اہم قومی امور پر غور کیا جائے گا۔

ذرائع کے مطابق اجلاس میں آٹھ نکاتی ایجنڈے پر تبادلہ خیال کیا جائے گا، جس میں مختلف وزارتوں اور پالیسیوں سے متعلق فیصلے شامل ہیں۔

اجلاس میں رائٹ سائزنگ کمیٹی کی سفارشات منظوری کے لیے پیش کی جائیں گی، جبکہ نارکوٹکس ڈویژن کو وزارت داخلہ میں ضم کرنے اور ایوی ایشن ڈویژن کو وزارت دفاع میں شامل کرنے کی تجاویز پر غور کیا جائے گا۔

اس کے علاوہ قومی کمیشن برائے اقلیت ایکٹ 2024 کی منظوری بھی ایجنڈے کا حصہ ہے۔

ذرائع کے مطابق اجلاس میں پبلک پروکیورمنٹ ریگولیٹری اتھارٹی (PEPRA) قوانین میں ترامیم پر بھی غور کیا جائے گا، جبکہ ممبر ماحولیاتی ٹریبونل اسلام آباد کی مدت میں مزید دو سال کی توسیع کی سمری پیش کی جائے گی۔

اس کے ساتھ ساتھ، کابینہ کمیٹی برائے قانون سازی (CCLC) کے فیصلوں کی توثیق بھی اجلاس کے ایجنڈے میں شامل ہے۔ توقع ہے کہ اجلاس میں اہم حکومتی پالیسیوں پر تفصیلی مشاورت کے بعد حتمی فیصلے کیے جائیں گے۔