نوبل انعام یافتہ ملالہ یوسفزئی نے کہا کہ طالبان خواتین کو انسان نہیں سمجھتے، ایک دہائی سے افغان طالبان نے طالبات سے تعلیم کا حق چھین رکھا ہے۔

مسلم معاشروں میں لڑکیوں کی تعلیم، مواقع اورچیلنجز کے عنوان پر عالمی کانفرنس سے خطاب کرتے ہوئے ملالہ یوسفزئی نے کہا اس کانفرنس کا مقصد پورا نہیں ہوگا اگر ہم افغان لڑکیوں کی تعلیم کی بات نہیں کریں گے۔

ملالہ یوسفزئی نے کہا کہ افغان طالبان نے خواتین کی تعلیم روکنے کے حوالے سے 100 سے زائد قانون سازیاں کیں۔

 انہوں نے یہ بھی کہا کہ دنیا بھر میں 120 ملین لڑکیاں اسکول نہیں جاسکتیں، جبکہ پاکستان میں ساڑھے 12 ملین لڑکیاں اسکول نہیں جاتیں، ہر لڑکی کا حق ہے کہ وہ 12 سال کے لیے اسکول جائے۔

 ملالہ یوسفزئی نے کہا کہ مسلم ورلڈ لیگ کا شکریہ جنہوں نے اتنی بڑی تعداد میں لوگوں کو یہاں جمع کیا، غزہ میں اسرائیل نے پورا تعلیمی نظام تباہ کردیا خواتین کی تعلیم میرے دل کے بہت قریب ہے۔

ان کا یہ بھی کہنا تھا کہ سیکھنا ہماری اسلامی تعلیمات میں شامل ہے، حضرت عائشہؓ، فاطمہ جناح جیسی خواتین ہمارے لیے مشعل راہ ہیں۔

ملالہ یوسفزئی نے مزید یہ بھی کہا کہ پاکستان سے میں نے اپنا سفر شروع کیا اور میرا دل ہمیشہ پاکستان میں رہتا ہے دنیا کے رنگوں میں پاکستان کی لڑکیوں کا بھی حصہ درکار ہے۔