کراچی: معروف مذہبی اسکالر مولانا طارق جمیل نے آباد ہاؤس میں خطاب کرتے ہوئے کہا کہ انسان کے بارے میں قرآن میں لکھا ہے کہ وہ بہت بڑا جاہل اور بہت بڑا ناداں ہے۔

ملک کے معروف مذہبی اسکالر مولانا طارق جمیل نے آباد ہاؤس میں شرکاء سے خطاب کیا جس دوران ان کا کہنا تھا کہ قرآن میں لکھا ہے کہ تم کچھ بھی نہیں جانتے۔ تم نے جو کچھ سیکھا ہے وہ خود نہیں سیکھا، وہ تمہیں اللّٰہ نے عطا کیا ہے۔

انہوں نے کہا کہ انسان کے بارے میں قرآن میں لکھا ہے کہ وہ بہت بڑا جاہل ہے اور بہت بڑا ناداں ہے، اللّٰہ نے صرف اپنے محبوب کو اپنے دو صفاتی نام دیے، رؤف الرحیم۔

مولانا طارق جمیل نے بتایا کہ انسانی دماغ 5 سے 6 فیصد کام کرتا ہے جب کہ مکمل کام جنت میں کرے گا۔ ہم ایک وقت میں دو کام نہیں کرسکتے لہٰذا اللّٰہ کی طرف دوڑو۔

ان کا کہنا تھا کہ عربی میں جب اظہارِ محبت بلندی پر پہنچتا ہے تو اللّٰہ اپنے محبوب سے کہتا ہے “مجھے آپ کے رب کی قسم”۔ یہاں وہ صاحبِ حیثیت ہے جو محمدیت پر ہیں جب کہ اللّٰہ اگر اپنی ایک تجلی نازل کرے تو کل کائنات جل کر بھسم ہوجائے۔

مولانا طارق جمیل کہتے ہیں کہ ناسا نے آج تک 3 فیصد کائنات کو کھوجا ہے، 97 فیصد ڈارک ہے۔ دنیا کو جتنا بھی آباد کرلیں، اس نے رہنا تو فانی ہی ہے۔

انہوں نے مزید کہا کہ دنیا میں سب سے آسان کام اللّٰہ کی رضا حاصل کرنا جب کہ دنیا میں مشکل ترین کام لوگوں کو راضی کرنا ہے۔ ہمارے لیے رسول اللّہ ﷺ کامل نمونہ ہیں نہ کہ مغرب جہاں سورج بھی غروب ہوجاتا ہے۔