اسلام آباد: بانی رکن پی ٹی آئی اکبر ایس بابر نے کہا ہے کہ انٹراپارٹی الیکشن کیس کا فیصلہ ہونے تک پی ٹی آئی کے اکاؤنٹس فریز کیے جائیں۔

اکبر ایس بابر نے میڈیا سے گفتگو کرتے ہوئے کہا کہ پی ٹی آئی کا الیکشن فراڈ پر ہوا، جیسے فارن فنڈنگ کیس کو آٹھ سال لٹکایا ویسے ہی انٹرا پارٹی کیس کو لٹکایا جا رہا ہے۔

انہوں نے کہا کہ جب تک قانونی الیکشن نہ ہو جائیں ان کی کوئی حیثیت نہیں ہے، یہ کس طرح تحریک انصاف کے وسائل استعمال کر رہے ہیں، ہم نے درخواست کی ہے کہ ان کے تمام اکاؤنٹس فریز کیے جائیں۔

بانی رکن پی ٹی آئی کا کہنا تھا کہ القادر ٹرسٹ کے حوالے سے جو فیصلہ آیا مجھے بانی رکن کے طور پر اس پارٹی کے لیے افسوس ہوتا ہے۔

اکبر ایس بابر نے مزید کہا کہ ہم نے تو ایسے لوگوں کو پارٹی میں ساتھ لے کر چلنا تھا جن کا ماضی کرپشن سے پاک ہو، آج طرح طرح کے لوگ اس پارٹی پر قابض ہیں۔