پاکستان ریلوے نے ٹکٹوں کی نئی پالیسی کی تحت ریفنڈ پالیسی کا اعلان کردیا۔

پاکستان ریلوے نے نئی ریفنڈ پالیسی کا اعلان کردیا ہے جس کے مطابق ریلوے ٹکٹوں کی واپسی کے لیے رابطہ کے ذریعے خریدے گئے ٹکٹوں پر لاگو ہوگا۔

پالیسی کے مطابق ریلوے کے مسافر پوائنٹ آف سیل سے خریدے گئے ٹکٹوں کے لیے ٹرین روانگی سے 48 گھنٹے قبل تک 90 فیصد رقم واپس حاصل کرسکتے ہیں۔

روانگی سے 24 سے 48 گھنٹے قبل تک 80 فیصد رقم واپس کی جائے گی جب کہ روانگی سے 24 گھنٹے کے اندر 70 فیصد رقم واپس کی جائے گی۔

ٹرین کی روانگی کے بعد صرف دو گھنٹے کے اندر 50 فیصد ریفنڈ دیا جائے گا اور اگر ٹرین 6 گھنٹے یا اس سے زیادہ لیٹ ہو تو مکمل رقم واپس کی جائے گی۔

پی او ایس سے خریدے گئے ٹکٹوں کی واپسی صرف انہی کاؤنٹرز پر ہوگی، ریفنڈ لینے کے لیے مسافروں کو اصل ٹکٹ اور شناختی کارڈ کی کاپی جمع کرانا ہوگی جس کے بعد کینسلیشن سلپ اور رقم دی جائے گی۔

دوسری جانب آن لائن ٹکٹوں کا ریفنڈ صرف اسی آن لائن سروس کے ذریعے ممکن ہوگا جس سے ادائیگی کی گئی ہو۔ آن لائن ٹکٹوں کے لیے بھی وہی ریفنڈ پالیسی ہوگی جو پی او ایس کے لیے مقرر ہے۔

آن لائن ٹکٹوں کا ٹرین کی روانگی کے بعد کوئی ریفنڈ نہیں دیا جائے گا جب کہ آن لائن ٹکٹ اگر ٹرین کی روانگی میں 1 گھنٹے 30 منٹ سے کم وقت باقی ہو تو ٹکٹ کینسل نہیں ہوگا۔

پاکستان ریلوے کا کہنا ہے کہ مسافروں کو چاہیے کہ وہ اپنی بکنگ سے متعلق درست معلومات حاصل کریں اور ریفنڈ کے قواعد کو مدنظر رکھتے ہوئے ٹکٹ کی واپسی کے لیے درخواست دیں۔

پاکستان ریلوے نے بتایا کہ مزید معلومات کے لیے قریبی ریلوے اسٹیشن یا پاکستان ریلوے کی آفیشل ویب سائٹ سے رجوع کیا جا سکتا ہے۔