وفاقی ٹیکس محتسب ڈاکٹر آصف محمود جاہ نے صدر آصف علی زرداری کو محتسب کی سالانہ رپورٹ 2024 پیش کی۔

رپورٹ میں ادارے کی کارکردگی اور ٹیکس گزاروں کو فراہم کیے گئے ریلیف کا تفصیلی جائزہ پیش کیا گیا۔

رپورٹ کے مطابق سال 2024 میں ریکارڈ 13,506 شکایات درج کی گئیں، جن میں سے 12,914 شکایات کا کامیابی سے ازالہ کیا گیا۔

ڈاکٹر آصف محمود جاہ کے چارج سنبھالنے کے وقت سال 2021 میں شکایات کی تعداد صرف 2,816 تھی، جو موجودہ کارکردگی کا واضح عکاس ہے۔

وفاقی ٹیکس محتسب کی رپورٹ میں انکشاف کیا گیا کہ سال 2024 میں ٹیکس گزاروں کو ٹیکس ریفنڈ کی مد میں 22.79 ارب روپے کا ریلیف فراہم کیا گیا۔

اس کے علاوہ سمندر پار پاکستانیوں کی بڑی تعداد میں شکایات کو بھی حل کیا گیا، جسے ادارے کی ایک بڑی کامیابی قرار دیا گیا ہے۔

وفاقی ٹیکس محتسب نے صدر مملکت کو ادارے کی مضبوط کارکردگی اور ٹیکس دہندگان کے مسائل کے تیز رفتار حل کی یقین دہانی کرائی۔

صدر آصف علی زرداری نے وفاقی ٹیکس محتسب کی کارکردگی کو سراہتے ہوئے اسے ملکی معیشت کے استحکام اور ٹیکس دہندگان کے اعتماد میں اضافے کے لیے اہم قرار دیا۔

رپورٹ میں مزید کہا گیا ہے کہ وفاقی ٹیکس محتسب ادارہ شکایات کے بروقت ازالے کے لیے مسلسل کوششیں کر رہا ہے، جس سے ٹیکس گزاروں کے اعتماد اور ٹیکس نظام کی شفافیت میں نمایاں بہتری آئی ہے۔