وزیراعظم محمد شہباز شریف نے دسمبر 2024ء میں مہنگائی کی شرح 4.1 فیصد تک پہنچنے پر اطمینان کا اظہار کیا۔

انہوں نے کہا کہ یہ 81 ماہ کی کم ترین سطح ہے، جو حکومت کی معاشی اصلاحات کے کامیاب نتائج کی نشاندہی کرتا ہے۔

وزیراعظم نے کہا کہ پاکستان نے میکرو اکنامک استحکام حاصل کر لیا ہے، تاہم یہ صرف آغاز ہے۔ ہم نے اڑان پاکستان جیسے بڑے منصوبے کا آغاز کیا ہے، جو پاکستان کو دنیا کے صف اول ممالک میں شامل کر دے گا۔

شہباز شریف نے مزید کہا کہ حکومت معاشی اصلاحات کی پالیسی پر گامزن ہے اور یہ پالیسی ملکی معیشت کے استحکام میں اہم کردار ادا کر رہی ہے۔

وزیراعظم نے اس بات پر بھی خوشی کا اظہار کیا کہ 24 سال بعد پاکستان کا کرنٹ اکاﺅنٹ سرپلس ہو گیا ہے اور افراط زر کی شرح 38 فیصد سے کم ہو کر 4.1 فیصد تک آ چکی ہے۔

ان کا کہنا تھا کہ اسٹاک مارکیٹ دنیا کی دوسری بہترین مارکیٹ بن چکی ہے اور پالیسی ریٹ 22 فیصد سے کم ہو کر 13 فیصد پر آ گیا ہے۔

انہوں نے حکومتی معاشی اور مالیاتی ٹیم کی محنت کو سراہا، جو ملکی معیشت کو استحکام کی جانب لے جا رہی ہے۔

وزیراعظم نے کہا کہ ہمیں عوام کی مشکلات کا احساس تھا اور ان کے حل کے لیے دن رات کام کیا ہے۔ ان شاءاللہ عوام کی زندگیوں میں مزید بہتری آئے گی۔