صدر آصف علی زرداری کی آذربائیجان کے وزیر دفاعی صنعت وگار مصطفٰی یوو سے ایوان صدر میں ملاقات ہوئی  جس میں دونوں ممالک کے مابین تعاون بڑھانے پر اتفاق کیا گیا۔

ملاقات میں دونوں ممالک کے درمیان تجارت، توانائی، فضائی اور عوامی روابط کے شعبوں میں تعاون بڑھانے کے حوالے سے گفتگو کی گئی۔

صدر مملکت نے اس موقع پر کہا کہ پاکستان اور آذربائیجان کے درمیان تاریخی اور گہرے تعلقات ہیں، اور ان تعلقات کو مزید مستحکم کرنے کی ضرورت ہے۔

انہوں نے کہا کہ عوامی، سیاحتی اور تجارتی تعلقات کو بڑھا کر علاقائی اقتصادی تعاون کو فروغ دیا جا سکتا ہے۔

صدر نے پاکستان اور آذربائیجان کے مابین ثقافتی روابط اور عوامی وفود کے تبادلوں کو مزید فروغ دینے کی اہمیت پر بھی زور دیا۔

صدر آصف علی زرداری نے آذربائیجان کے وزیر دفاعی صنعت کی توجہ اس بات پر دلاتے ہوئے کہا کہ براہ راست پروازوں کا آغاز دونوں ممالک کے عوامی روابط کو مزید مستحکم کرنے میں مددگار ثابت ہوگا۔

انہوں نے امید ظاہر کی کہ براہ راست پروازیں عوامی سطح پر تعلقات کو مزید فروغ دیں گی۔

آذربائیجان کے وزیر دفاعی صنعت وگار مصطفٰی یوو نے دونوں ممالک کے درمیان گہرے تعلقات کو اجاگر کرتے ہوئے کہا کہ آذربائیجان پاکستان کے ساتھ توانائی، کاروبار اور ثقافت کے شعبوں میں تعاون بڑھانے کا خواہاں ہے۔

انہوں نے اس بات پر بھی زور دیا کہ دونوں ممالک نے مشکل وقت میں ایک دوسرے کا ساتھ دیا اور آذربائیجان کے عوام پاکستان کی سیاسی حمایت کو ہمیشہ یاد رکھیں گے۔

وزیر دفاعی صنعت نے صدر مملکت کے پرتپاک استقبال پر شکریہ ادا کیا اور آذربائیجان کے صدر کی جانب سے صدر پاکستان کے لیے نیک خواہشات کا اظہار کیا۔ ساتھ ہی انہوں نے پاکستان کے امن و خوشحالی کے لیے بھی آذربائیجان کے صدر کی نیک خواہشات کا پیغام پہنچایا۔

اعلامیہ کے مطابق، 2024 میں 72,000 سے زائد پاکستانیوں نے کاروباری اور سیاحتی مقاصد کے تحت آذربائیجان کا دورہ کیا۔