اسلام آباد: نائب وزیراعظم اسحاق ڈار نے کہا ہے کہ آپ نے محسوس کیا ہوگا کہ مہنگائی کا طوفان تھم گیا ہے، پاکستان کی معیشت بہتری کی جانب گامزن ہے۔

وفاقی وزیر خارجہ اسحاق ڈار نے میڈیا کو بریفنگ دیتے ہوئے کہا کہ مہنگائی کے طوفان کو قابو کیا ہے، پالیسی ریٹ 22 فیصد سے 13 فیصد پر آگیا ہے۔

انہوں نے کہا کہ زرمبادلہ کے ذخائر میں نمایاں اضافہ ہوا ہے، جی ڈی پی کے اشاریے بھی بہتر ہورہے ہیں جبکہ بجلی کی قیمتوں کو کنٹرول کرنے کیلئے اقدامات کیے ہیں، آئی ٹی سمیت مختلف سیکٹرز میں اہم کردار ادا کررہے ہیں۔

اسحاق ڈار نے کہا کہ آپ نے محسوس کیا ہوگا کہ مہنگائی کا طوفان تھم گیا ہے، وزیراعظم نے پاکستان کو ترقی کی راہ پر گامزن کردیا ہے، انہوں نے اڑان پاکستان کا پروگرام قوم کے سامنے پیش کیا، اڑان پاکستان پروگرام 5 سالہ منصوبہ ہے۔

نائب وزیراعظم نے کہا کہ حکومت نے 2024 میں بہت سے چیلنجز کو بہتر انداز میں ڈیل کیا، پاکستان کی معیشت بہتری کی جانب گامزن ہے۔

انکا کہنا تھا کہ پاکستان عالمی سطح فورم پر متحرک کردار ادا کررہا ہے پاکستان کی سفارتی تنہائی کا بےبنیاد پروپیگنڈا کیا گیا، پاکستان عالمی سطح پر تنہائی کا شکار ہونے کا تاثر ہوا میں اڑا چکا ہے، ہم نے بھرپور کوشش کی اورسفارتی محاذپرپاکستان کو مضبوط کیا۔

اسحاق ڈار نے کہا کہ او آئی سی میں پاکستان نے اسلاموفوبیا کے معاملے کو بھی اٹھایا، پاکستان نے دنیا میں غزہ کا مقدمہ بھرپور انداز میں لڑا، وزیراعظم نے غزہ میں مظالم پر اسرائیل کی دہشتگردی کودنیا کے سامنے رکھا۔

نائب وزیراعظم نے مزید کہا کہ مختلف ممالک سے تعلقات میں بہتری کیلئے دفترخارجہ ذمہ داریاں ادا کررہا ہے، ممتاز زہرا بلوچ کو فرانس میں سفیر متعین کیا ہے، آئندہ ہفتے سے نئے ترجمان بریفنگ دیا کریں گے۔