پریس ایسوسی ایشن سپریم کورٹ کے انتخابات میں بول ٹی وی کے سینئر صحافی ذوالقرنین اقبال بھاری اکثریت سے صدر منتخب ہو گئے۔

انتخابات میں ذوالقرنین اقبال 27 ووٹ حاصل کیے جبکہ ان کے مدمقابل جہانزیب عباسی 11 ووٹ لینے میں کامیاب ہوئے۔

دیگر عہدوں پر بھی زبردست مقابلہ دیکھنے میں آیا۔ غلام نبی یوسفزئی 27 ووٹ لے کر سیکرٹری منتخب ہوئے جبکہ ان کے مدمقابل سعید بلوچ کو 11 ووٹ ملے۔ عابد آرائیں نائب صدر جبکہ ابرار استوری کو سیکرٹری فنانس منتخب کر لیا گیا۔

سیکرٹری اطلاعات کے لیے احمد فواد اور شہریار بخاری کے درمیان کانٹے دار مقابلہ ہوا، جس میں احمد فواد 23 ووٹ حاصل کر کے کامیاب قرار پائے جبکہ شہریار بخاری 15 ووٹ حاصل کر سکے۔

انتخابات میں گورننگ باڈی کے لیے تین ممبران وسیم ملک، سحرش خان اور نثار عابد بلا مقابلہ منتخب ہو گئے۔

نومنتخب عہدیداران نے اعتماد کا اظہار کرنے پر ممبران کا شکریہ ادا کیا اور عہد کیا کہ وہ صحافی برادری کے مسائل کے حل اور آزادی صحافت کے فروغ کے لیے بھرپور کردار ادا کریں گے۔