وزیراعلیٰ پنجاب مریم نواز سے چین کے معروف بی جی آئی گروپ کے چیئرمین وانگ جیان کی ملاقات ہوئی، جس میں کینسر کے علاج اور جدید جینیاتی تحقیق کے حوالے سے اہم پیشرفت پر بات چیت کی گئی۔

ملاقات میں دونوں فریقین نے پنجاب میں جینیاتی سائنس کے شعبے میں پبلک پرائیویٹ پارٹنرشپ کے فروغ اور بائیولوجیکل جین بینک کے مرکز کی بنیاد رکھنے کا جائزہ لیا۔

وزیراعلیٰ مریم نواز نے کہا کہ بی جی آئی گروپ کی جانب سے کینسر کے علاج، جینیاتی ٹیسٹنگ اور جدید تحقیق کے لیے فراہم کی جانے والی مدد پنجاب کے عوام کے لیے ایک بڑی کامیابی ہوگی۔

انہوں نے اس بات پر زور دیا کہ اس اشتراک سے پنجاب میں جینیاتی ٹیکنالوجی کے استعمال کے لیے جدید ترین لیبارٹریز قائم کی جائیں گی، جس سے نہ صرف کینسر کی تشخیص اور علاج میں بہتری آئے گی بلکہ دنیا بھر میں پنجاب کا نام سائنسی تحقیق میں نمایاں ہوگا۔

ملاقات میں اس بات پر بھی اتفاق کیا گیا کہ نوازشریف کینسر اسپتال میں جین سیکوینسنگ یونٹ قائم کیا جائے گا۔ علاوہ ازیں، بی جی آئی گروپ نے بہاولپور کے صحرائی علاقے میں چاول اور مکئی کی کاشت کے لیے پائلٹ پروجیکٹ کی پیشکش بھی کی، جس سے زراعت کے شعبے میں جدیدیت لانے کی امید ہے۔

وزیراعلیٰ مریم نواز نے اس پیشکش کا خیرمقدم کرتے ہوئے وزیر زراعت کو فوکل پرسن مقرر کرنے کا اعلان کیا اور اس بات پر بھی اتفاق کیا کہ پنجاب میں کپاس کی پیداوار میں 15 فیصد اضافے کے لیے جی ایم اوکاٹن کی کاشت پر کام کیا جائے گا۔

مریم نواز نے اس منصوبے کو ایک گیم چینجر قرار دیتے ہوئے کہا کہ اس اشتراک سے پنجاب میں نہ صرف کینسر کے علاج میں نئی پیشرفت ہو گی بلکہ جدید جینیاتی تحقیق اور ٹیکنالوجی کے شعبے میں بھی نمایاں ترقی ہو گی۔

بی جی آئی گروپ کے چیئرمین وانگ جیان نے اس بات کی یقین دہانی کرائی کہ گروپ پنجاب کو جدید ترین طبی تحقیق اور جینیاتی سائنس میں نمایاں مقام دلانے کے لیے بھرپور تعاون فراہم کرے گا۔