حکومتِ سندھ کی ترجمان اور ایم پی اے سعدیہ جاوید نے جماعت اسلامی کے امیر کو کرارا جواب دیتے ہوئے کہا کہ چیئرمین بلاول بھٹو زرداری کی بڑھتی ہوئی مقبولیت سے جماعت اسلامی کی پیٹ میں مروڑیں اٹھ رہی ہیں۔

انہوں نے مزید کہا کہ “جماعت اسلامی اور دیگر کے جرائم پیپلز پارٹی کے کھاتے میں نہ ڈالے جائیں۔

سعدیہ جاوید نے جماعت اسلامی پر تنقید کرتے ہوئے کہا کہ تعلیمی اداروں میں دہشت گردی اور نسلہ ٹاور جیسے مسائل جماعت اسلامی کے ٹریڈ مارک ہیں۔ انہوں نے کہا کہ جماعت اسلامی کے ناظم نے کراچی کے ماسٹر پلان کو برباد کیا، جس کا خمیازہ آنے والی نسلوں کو بھگتنا پڑے گا۔

ترجمان حکومت سندھ نے جماعت اسلامی کی سیاست پر تبصرہ کرتے ہوئے کہا کہ اپنی ناکامیوں اور جرائم پر پردہ ڈالنے کے لیے تعصب اور تقسیم کی سیاست کے پیچھے منہ چھپانا جماعت اسلامی کا وطیرہ ہے۔

سعدیہ جاوید نے کراچی میں امن قائم کرنے کا کریڈٹ پیپلز پارٹی کو دیتے ہوئے کہا کہ کراچی میں امن قائم کرنا پیپلز پارٹی کا طرہِ امتیاز ہے۔ انہوں نے مزید کہا کہ چیئرمین بلاول بھٹو زرداری کے ویژن نے کراچی کو ترقی کی راہ پر گامزن اور بھائی چارے کا گہوارہ بنا دیا ہے۔

انہوں نے یہ بھی کہا کہ پورے ملک کی طرح آج کراچی کی سیاست کا محور اور مرکز بھی بلاول بھٹو زرداری ہیں۔