خیبرپختونخوا کے عوام نے آرمی چیف جنرل سید عاصم منیر اور سیاسی قیادت کے دہشت گردی کے خلاف اتفاق  کو سراہتے ہوئے کہا کہ یہ دہشت گردوں کے لیے بہت بڑا پیغام ہے۔

عوام کی جانب سے جاری کردہ بیان میں کہا گیا کہ اس قسم کی اتفاق رائے سے پورے ملک اور خصوصاً خیبرپختونخوا میں امن و امان کی صورتحال میں بہتری آئے گی، ہم بھی یہی چاہتے ہیں کہ اس طرح کے اقدامات سے دہشت گردی کا خاتمہ ہو۔

عوام کا کہنا تھا کہ صوبے سمیت پورے ملک میں امن قائم ہوگا، عوام کو بہتر اور سکون بھری زندگی فراہم کی جائے تاکہ وہ اپنے روزگار پر توجہ دے سکیں، اس مقصد کے لیے یہ ایک مثبت قدم ہے۔

عوام کی جانب سے مزید کہا گیا کہ آرمی چیف کا دورہ پشاور اور یہاں صوبائی حکومت کا ساتھ بیٹھنے سے ہمیں حوصلہ ملا ہے اور امن کی جانب ایک مثبت پیش رفت ہوئی ہے، اس اقدام سے ہمارے ذہنوں کو سکون ملا ہے، ہم امید کرتے ہیں کہ آئندہ جو بھی ہوگا وہ پاکستان کی بہتری کے لیے ہوگا، ہم سیاسی لیڈرز کے بھی مشکور ہیں جو آرمی چیف کے ساتھ کھڑے ہیں۔  یہ امن کی جانب ایک مثبت قدم ہے۔