صدر مملکت آصف علی زرداری نے کہا ہے کہ شہید ذوالفقار علی بھٹو پاکستان کے ایٹمی پروگرام کے معمار تھے۔

صدر آصف زرداری نے شہید ذوالفقار علی بھٹو کے 97 ویں یوم پیدائش کے موقع پر پیغام دیتے ہوئے کہا کہ شہید ذوالفقار علی بھٹو کے 97 ویں یوم پیدائش پر وژنری رہنما کو خراج تحسین پیش کرتے ہیں، انہوں نے پاکستان کی تقدیر بدلی اور بے آوازوں کی آواز بنے۔

انہوں نے کہا کہ شہید ذوالفقار علی بھٹو بے مثال ذہانت، حوصلے اور کرشماتی شخصیت کے حامل سیاستدان تھے، انہوں نے ہمیں پہلا متفقہ طور پر منظور شدہ 1973 کا آئین دیا اور پارلیمانی، جمہوری اور وفاقی طرز حکومت کی بنیاد رکھی۔

آصف علی زرداری نے کہا کہ شہید ذوالفقار علی بھٹو پاکستان کے ایٹمی پروگرام کے معمار تھے، ہمارا ایٹمی پروگرام ہماری خودمختاری اور سلامتی کے تحفظ میں کلیدی حیثیت کا حامل ہے۔

انکا کہنا تھا کہ شہید ذوالفقار علی بھٹو کی قیادت میں پاکستان نے چین اور دیگر کئی دوست ممالک کے ساتھ خارجہ تعلقات کو مضبوط کیا، شہید بھٹو نے صنعتی اور تکنیکی شعبے کو ترقی دی، انہوں نے روسی تعاون سے کراچی میں پاکستان اسٹیل ملز کا قیام عمل لایا۔

صدر مملکت نے کہا کہ شہید بھٹو نے ہماری دفاعی صنعت کو ترقی دی جس سے ہماری دفاعی صلاحیتوں میں اضافہ ہوا، ان کی مدبرانہ حکمت عملی کی وجہ سے 1974 میں پاکستان نے اسلامی سربراہی کانفرنس کی میزبانی کی، کانفرنس نے مسلم دنیا کے رہنماؤں کو امت مسلمہ کے درمیان اتحاد اور تعاون کو بڑھانے کے لیے اکٹھا کیا۔

انہوں نے کہا کہ شہید بھٹو کی کوششوں نے ترقی پذیر ممالک اور اسلامی دنیا میں پاکستان کے قائدانہ کردار کو تقویت بخشی، انہوں نے پسماندہ افراد کو بااختیار بنانے اور معاشی تفاوت کو ختم کرنے پر بھی توجہ دی۔

آصف زرداری نے کہا کہ شہید ذوالفقار علی بھٹو نے اصولوں پر سمجھوتہ کرنے کے بجائے پھانسی کے پھندے کا سامنا کیا، اُن کی قربانی نے شہید بھٹو کو مزاحمت اور استقامت کی شمع کے طور پر امر کر دیا۔

صدر کا کہنا تھا کہ آئیے جمہوریت، مساوات اور سماجی و اقتصادی انصاف کے شہید بھٹو کے نظریات کے لیے اپنے عزم کی تجدید کریں، ترقی پسند، خودمختار، اور جامع پاکستان کا شہید بھٹو کا خواب آج پہلے سے کہیں زیادہ اہم ہے۔

انہوں نے مزید کہا کہ ہمیں ایک ایسے پاکستان کی تعمیر کے مشن کو آگے بڑھانے کی ضرورت ہے جہاں عوام کا راج ہو اور جہاں ہر شہری کو یکساں مواقع میسر ہوں، آئیے ملک کو موجودہ چیلنجز سے نکالنے اور پاکستان کو ایک خوشحال اور ترقی یافتہ ملک بنانے کے لیے مل کر کام کریں۔